Shillong, Lber 17: U Bah HR Kurbah president jong ka Seng Khihlang u la iathuh ba ia ka jingiakynduh lang ka seng Khihlang kaba la buh ban long ha ka 27 haduh ka 29 tarik mynta u bnia ha Raid Wahiajer la hap ban pynsangeh noh ha dien ba la kyrpad da ka sorkar namar ban iada na ka COVID-19.
Haba kren ha ki lat pathai khubor mynta ka sngi ha Shillong Press Club u President ka Seng Khihlang u bah HR Kurbah u la ong ba ia kane ka juh ka jingiakynduhlang yn sa pynbna ha u bnai Iaiong u ban wan.
Ha kawei pat ka khubor na ka liang jong ka Seng Khasi Kmie, ka sngew ba kan kyntu ia baroh ki Circle ne ki tnat Seng Khasi ba don ha kylleng sawdong ka bri Hynñiewtrep, ba lada long kaba lah, ia mynta ban pynsangeh noh shwa ha kaban pynlong ia ki Shad Suk Mynsiem ne ki Seng Kyrsiew, kiba dei ban long haduh ka 31 tarik u Bnai Lber 2020.
Kane ka jingai jingmut ka Seng Khasi kmie ka dei halor ka nongrim ba ka la ioh pdiang ia ka kyrwoh na ki bor sorkar ka jylla kaba la shim ia ki lad ki lynti ban iada naka jingsaphriang jong ka jingpang ba la pur ha kylleng sawdong ka pyrthei ka Covid-19 (Coronavirus).
U bah Ardent Basaiawmoit mynta ka sngi u la pynbna ba la pynsangeh shuwa ia baroh ki jingialang kiba ka kynhun Iada La Kari kala dep ban pynbna na ki daw jong ka jinglong jingman ka pyrthei bad ka jylla. Ia ki jingialang yn sa pynbna biang ha dien.
