Ia kynduh u Bah Hek ia u myntri DoNER Dr Jitendra bad ia kren ia ka khlam COVID-19

New Delhi, Risaw 7: Mynta ka sngi u myntri ka tnad ka koit ka khiah jong ka jylla Meghalaya u bah A L Hek u la ia kynduh ia u myntri khynnah ka sorkar pdeng u Dr Jitendra Singh bad ha kane ka jingiakren nalor kiwei kiwei ki kam kila ia kren ruh halor ka khlam COVID-19.

U bah A L Hek ha kane ka jingiakynduh bad u myntri ka sorkar pdeng ba dei peit ia ka DoNER, u la pynpaw bad ai ka jingiaroh ia ki ASHA bad ki Aganwadi kiba la long ki nongmuna ha kane ka jingiakhun pyrshah ia kane ka khlam COVID-19 ha kine ki hynriew bnai.

Ha kane ka jingiakynduh na ka liang jong u myntri ka sorkar pdeng u Dr Jitendra u la ai ka jingiaroh ia ki jylla ka thain shatei lam mih ngi jong ka Ri India ha ka jingiakhun pyrshah ia kane ka khlam COVID-19, khamtam ia ki riew paidbah kiba la mih lang sha khmat ban iada na ka jingsaphriang kane ka jingpang COVID-19.

Ia kane ka jingiaroh kaba la ai da u myntri khynnah ka sorkar pdeng ba dei peit ia ka DoNER u la kren ha ka jingiakynduh bad u myntri ka tnad ka koit ka khiah ka sorkar Meghalaya bad kane ka jingiaroh ka long ha dien ba la dep ban jurip na baroh ki jylla ha ka Ri India.

U Dr Jitendra u la ai ka jingiaroh ia ka sorkar Meghalaya kaba la shim khia ia kane ka jingiakhun pyrshah ia ka khlam COVID-19 naduh kaba sdang da kaba pynkhlain ia ki lat ai jingsumar ban lah ban iada na ka jingsaphriang lada ka don ka jingkiew ha kiba ioh ia kane ka jingshitom.

U Myntri ka sorkar pdeng u la ong ba kam dei kaba suk ia ki jylla ban pynlait na ka jingshah ktah na kane ka jingpang COVID-19 ha kaba na ki phra tylli ki jylla san tylli ki jylla ki lait na kane ka jingpang bad ka jingpang ka sdang ban ioh rung dei tang ha dien ba la shah ia ka jingialeit ia wan jong ki briew.

Haba ia dei bad ki kam pynroi la ong ba ha kine ki hynriew snem ki jylla North East ki long shisha ki nongmuna ha kaba ia dei bad ka jingkiew ha ki kam pynroi bad ki long ruh ki nuksa ia kiwei ha ka jingiakhun pyrshah ia ka khlam Corona ha kine ki hynriew bnai.

U Dr Jitendra  u la ong ba na ka liang jong ka DoNER kala ai tang T.25 klur ia ki jylla ka thain shatei lam  mih ngi bad kane ka long shuwa ka jingkhang dam, hynrei ki jylla na lade kila shim khia ia kane ka kam ban khanglad ia ka jingsaphriang kane ka jingpang.

Katkum ka jingbthah jong u myntri rangbah duh jong ka Ri, la dep ban phah ia ki Oxygen sha baroh ki jylla ka thain shatei lam mih ngi jong ka Ri India bad kum juh sha Ladakh bad Jammu bad Kashmir.

Haba ia dei bad ka jingdon ia ki Ventilators na ki jylla North East kam shym don kano kano ka jingujor ban ong ba kin don ki jingduna khamtam ha ka Oxygen. U Myntri ka sorkar pdeng u la ai ka jingiaroh ia ki seng treimon sngewbha bad ia ki riew paidbah kiba la ia snoh lang ha ka jingiakhun ia kane ka khlam COVID-19.