Shillong, Jymmang 20: Kum shi bynta ban kyntiew ia ka sap ka talent ba
ki khynnah jong ka jylla ki don na ka liang jong ka All Jaintia Hills
Dancer Association (AJHDA) shen kan sa pynlong ia ka Dance Meghalaya
Dance ha ka Nongbah Shillong.
Na ka liang jong u President jong ka AJHDA u Bah Kyrshan Rymbai haba
kren bad ki lad pathai khubor u la ong kane ka Dance Meghalaya Dance
tang ia ki little master kiba hapoh jong ka 14 snem ka rta bad lyngba
kane kin lah ban kiew bad paw ruh wat shaduh ki wei pat ki jingiakhun
ha ka ri.
Shuh shuh na ka liang jong u Bah Rymbai u la ong ba ia kane ka Dance
Meghalaya Dance jong ki little master haduh mynta na ka bynta ka
edition kaba nyngkong ngi dang ap ban ioh ia ka jingbit na ki bor ba
dei khmih jong ka ri lum Garo, katba ha Khasi Hill pat ka edition kaba
ar yn sdang naduh ka 4 tarik jong u bnai Nailur bud pat sa ka 6 tarik.
Na ka bynta jong ki khynnah jong ka ri lum Jaintia bad kumjuh ruh ia
ki khynnah na ri lum Khasi yn leh ia kine ki edition ha U Soso Tham
Auditorium.
Na ka liang jong u Bah Rymbai ula pyntip ruh baroh ki khynnah kiba ioh
rung sha ka top 30 baroh yn leh noh ha ka nongbah Shillong kynthup
lang ia kito ki khynnah na Garo Hills.
Ia ki ba wan ha ka top 30 yn pynlong ha ka 3 tarik jong u bnai Risaw
katba ia ki top 10 pat yn leh ha ka 18 taik jong u bnai Risaw.
Ia kane yn niew da ki vote bad ynda la poi ha ka grand finale yn niew
shim beit 50-50 na ki vite bad na ki nongbishar.
Ha kajuh ka por na ka liang jong u Bah Rymbai u la iathuh ruh ba ka
khusnam na ka bynta ki jong kane ka jingiakhun ka long ia kiba wan
nyngkong ka khusnam kan long T. 1 lak katba ia kiba wan ba ar pat ka
dei 50 hajar tyngka.
Shuh shuh na ka liang jong kine ki nongialam kila iathuh ruh ba ka
AJHDA kan shim khia na ka bynta kito kiba wan ha ka top 30 ba buh da
ki nonghikai shad bad ruh ban phah ia ki sha ki national show kum ka
ha Dance India Dance bad ka India Got Talent.(SP News)
