Shillong, Nailar 20: U bah Lambokstarwell Marngar President barim ka KSU u la ong ba ka “Ehdaw Movement” jong ka seng kan dang iaid sha khmat hynrei ia ka lynti kaba kumno ym lah ban iathuh ne batai lut, hynrei la ong ha ba ka sorkar ka sdang ki hap ban bud.
Haba kren ha ki lat pathai khubor ha ophis treikam jong ka seng KSU ha Jaiaw u bah Lambokstarwell la ong haba don ka jingiakhih naduh mynshuwa ka jingshah kem ka jingshah thwet ka don beit,kam shym mut tang ban pynlait ia ki nongialam hynrei ka dei ba ka jingjop kaba kongsan ka long halor ki mat jing dawa.
U nongialam ba rim ka KSU u la ong ba kine ki jingjia ka dei ka buid jong ka sorkar ban theh umpjah ia ki mat jingdawa, ki jingdawa kiba ka KSU kala buh kam dei ka jingmyntoi ia ki dkhot ka KSU hynrei ka dei na ka bynta ki samla bad ka jaidbynriew.
Haba ia dei bad ki jingjia, la ong ba ki dei kiba khlem poi pyrkhat namar ha baroh ki jingialang kam juh jia ei ei, ha ki jingiaid paidbah ki juh iaid bad ki don ki jingjia malum mala na ka por sha ka por ia kaba kim lah ban kiar, ha ka jingjia mynnin ka KSU kam don kti ei ei kumba la pynshai da ki nongialam ka seng.
Haba ia dei bad ki jingjia ka seng ruh ka dang wad kila sdang ban lap ksai tang kim pat lah ban batai lut namar ki don ka jingsuba bad ki don ki nongshim kabu, u president barim ka seng la ong ba u la ialam ia ka seng khyndai snem u sngewthuh ba don kiba kwah pynthoh bria.
La ong ba ka sorkar ka hap ban jubab ia ki mat jingdawa bad ka sorkar ka dei ban siew ia ki iing kiba la shah pynpra ha jaiaw la ong ba ha ki jingialang kaba kila pynlong kam don kano kano ka jingjia hynrei ka jingjia pat kala pynbitar.
