Shillong, Nailar 20: Mynta ka sngi 20/Nailar/2026 ki paidbah na ka jylla Assam kila bat ia ki kali kiba don ia u nombar ka jylla Meghalaya ha Jorabad bad pynphai kylla ia ki khlem da shah ban rung sha Assam, ha kane ka jingjia kila don ki kali kiba la shah pynjulor.
Katkum ki khubor kiba la ioh la sngewthuh ba kane ka jingleh jong ki briew na ka jylla Assam ka long ban pynpaw pyrshah ia kawei kaba la jia ha kane ka nongbah Shillong ha ka 19/Nailar/2026 ba bun ki kali ba don ia u nombar ka jylla Assam kila shah pynjulor ha ka por ba ka KSU ka pynlong ia ka jingiaid paidbah kaba la tip kum ka Peace Rally.
Kane ka jingshah bat ki kali na Meghalaya ha Jorabad ka la kthah ia ki paidbah kiba mut ban leit ha la ki jingdonkam ki jong ki namar kim shym la lah ban poi sha ki jaka ba ki thmu namar ka jingshah pynphai noh na Jorabad kaba dei ka khappud ha pdeng ka Assam bad Meghalaya bad kaba dei ruh ka surok bah ba pyniasoh ia kine ki ar tylli ki jylla.
Haba iohi ia kane ka jingjia ki pulit ka jylla Assam kila poi sha kane ka jaka ban tem ia kane ka jingpynphai ia ki kali da ka jingpoi biang por ki pulit kam shym la don kano kano ka jingjia kaba sngewsih lait noh tang ka jingshah pynpait ki iit kali jong ki katto katne ki kali.
