Shillong, Nailar, 19: Mynta ka sngi ki nongtrei jong ka sorkar pdeng kiba la shongthait na ka kam ha kylleng ka Ri India kila pynlong iaka jingiakhih shong kyllain mungor halor ki 11 tylli ki mat jingdawa kaba kila buh hakhmat ka sorkar pdeng naduh u snem 2017.
Ha kane ka nongbah Shillong, ki nongtrei ka sorkar pdeng kila pynlong iaka jingiakhih shong kyllain mungor ha phyllaw ka ophis jong ka CTO bad ha kane ka sngi, kila ai ruh iaka dorkhas lyngba u Chief General Manager ka Telecom ban phah sha u Myntri Rangbahduh ka Ri India.
U Ramani Bhattacharya haba kren ha ka lad pathai khubor u la ong ba ki dawa ba ka sorkar pdeng ka dei ban weng noh iaka Pension Rule Validation Act 2025 bad ban ai pension iaki nongtrei ha ki tnad BSNL, MTNL bad kumjuh iaki nongtrei Bank. Kine ki long ki katto katne ki jingdawa na ki 11 tylli ki mat jingdawa.
La iathuh ba ha Meghalaya, ki don bun ki sorkar pdeng kiba dang ioh iaka pension dei halor kane ka nongrim ba kane ka kynhun Forum of Central Government Pensioners Civil Meghalaya ki iasnohkti lang bad kiwei de ki nongtrei sorkar pdeng kiba pynlong iaka jingiakhih mynta ka sngi ha baroh kawei ka Ri India halor ki 11 tylli ki mat jingdawa.
