Shillong, Nailar 19: Ka tnad Urban Affairs Department (UAD), ryngkat ka District Administration jong ka East Khasi Hills, kala pynkynriah lang iaki nongdie madan na ki thain Laitumkhrah bad Dhankheti thik pa thik katkum ka Meghalaya Street Vendors Scheme, 2023.
Ki nongdie kiba shong die jingdie mynshuwa na Laitumkhrah Junction shaduh Beat House bad na Dhankheti, mynta kila ioh jaka shong thymmai ha SMB Parking Lot (Dhankheti) bad ha madan Brightwell Bungalow. Ki jaka ba la pynkynriah iaki nongdie madan ki long ha khyndailad.
Ki don 387 ngut ki nongdie la dep pynkynriah sha MUDA Parking Lot, katba ha Quinton Road, la don 3 ngut ba la pynkynriah sha ka Parking Lot ba marpyrshah bad ka SBI. Ha Civil Hospital, 29 ngut la pynkynriah sha Barik Compound ha Polo, 48 ngut la pynkynriah sha Polo Hawkers Market ba don shadien ka Majestic Hotel.
Dhankheti, Malki, 8 ngut la pynkynriah sha Dhankheti Parking Lot, ha Laitumkhrah, la don 85 ngut la pynkynriah sha Dhankheti Parking Lot bad Brightwell Bungalow. Governor’s House, 2 ngut la pynkynriah sha ka Parking Lot ba marpyrshah bad ka SBI, Jailroad, 95 ngut la pynkynriah sha ka Parking Lot mar pyrshah SBI bad sha Polo Hawkers Market shadien Majestic Hotel.
Laban, Barik, Lumshatsngi, Red Cross, haduh 90 ngut la pynkynriah sha Brightwell Bungalow bad Parking Lot marpyrshah SBI. Lachumiere, 3 ngut la pynkynriah sha Brightwell Bungalow. Baroh kyllum la don kumba 750 ngut ki nongdie madan kiba bit ban ioh na kine ki thain kiba la kdew haneng kila ioh pdiang iaki jaka shong die jingdie ba la buh kyrpang hapoh Shillong.
La shna iaki jaka die jingdie thymmai ha MUDA Parking Lot, Dhankheti Parking Lot, Brightwell Compound, Parking Lot pyrshah SBI, Polo Hawkers Market bad Barik Compound. Kine ki jaka ki don ki jaka leit shabar, ka jingshai bad ka lynti kaba bit ba biang khnang ba ki nongdie madan kin nym kynjah bad shngain ban kamai ja kpoh.
Ka jingiatreilang ki tnad ka la long ka jingpynkhreh ia kine ki jaka ha kaba ka khot iaka jingiatreilang jong ka Urban Affairs Department (UAD), GAD, PWD, tnad ka koit ka khiah bad Forest Department. La pynkynriah ruh iaka ophis treikam u Deputy Chief Minister na Brightwell Bungalow ban pynlait jaka iaki nongdie madan.
Ka Town Vending Committee jong ka Laitumkrah kala khot iaki jingialang bun sien bad ki seng nongdie madan ban iasynrop bad pynbeit ryntih ia kane ka jingpynkynriah jaka khlem lada thut ka io kam ioh jam bad ka burom jong ki.
Ka Department ka sngewbha ba ki nongdie madan kila kynriah hi mardor bad mon sngewbha sha kine ki jaka ba la pynbeit khlem da donkam ka bor ne ka jingpynbor. Ka Urban Affairs Department ka pynpaw iaka jingsngewnguh bad jingiaroh iaki nongdie madan, ka Town Vending Committee, ka ophis u DC East Khasi Hills, Shillong Municipal Board, Shillong Traffic Police, bad kiwei ki tnat na ka bynta kane ka jingtreilang kaba iaid beit iaid ryntih.
Ban iarap iaki nongdie madan kiba la shah ktah na kane ka jingpynkynriah jaka, u Myntri Rangbah ka jylla Meghalaya, u Conrad K. Sangma u la pyllait iaka Chief Minister’s Urban Livelihood Grant. Ki nongdie madan kiba don iaka Certificate of Vending (CoV) kin ioh baroh kawei ₹20,000. Ka kynthup iaka ₹10,000 kaba nyngkong (upfront payment) bad sa ₹2,000 shi bnai hapoh san bnai.
