Shillong, Nailar, 19: Mynta ka sngi u Kishore Ch Gautam, Secretary General ka High Court jong ka Meghalaya Bar Association bad u bah T. L. Jyrwa, Secretary Shillong Bar Association kila pynpaw ba haduh mynta kim pat ioh iaka jubab na u Myntri Rangbah ka jylla Meghalaya, u Conrad K. Sangma halor ka jingdawa ban weng noh ia u Amit Kumar kum u Advocate General ka jylla Meghalaya.
Kitei ki nongialam jong ki ar tylli ki seng jong ki muktiar haba kren ha Shillong Press Club kila iathuh ba hooid kila phah iaka jingthoh sha u Myntri Rangbah ka jylla kaba kila dawa ban weng noh ia u Amit Kumar kum u Advocate General ka jylla Meghalaya ia kaba kim pat ioh iaka jingthoh haduh mynta.
Ka jingdawa jong ka seng ka long halor ka nongrim ba kila don ka jingkren ba pynmong iaki muktiar, kum ki muktiar kim kwah ban kren eiei hynrei, namar ba kila mih pat ha ki lad pathai khubor kumta kim lah shuh ban shu sngap bad mynta, ki kwah ban pynshai bad ka jingai por kala kut kumta, kin dang don biang ka jingiakynduh ha ka 24 tarik Nailar ba kin shim iaka rai.
