Shillong, Nailar 19: Mynta ka sngi ha ka jingialang jong ka cabinet kala shim ia ka rai ban pynkylla ia ki ain jong ki lai tylli ki skul bah bad ban wanrah thymmai ar tylli ki Bills ban don ia ki skul bah ha ka jylla bad kawei pat kin pynduh noh.
Haba kren ha ki lat pathai khubor ha dien bala wai ka jingialang u myntri ka tnad ka koit ka khiah u bah Wailadmiki Shylla u la ong ba ka cabinet kala shim ia ka rai ban ban wanrah jingpynkylla ha ki skul bah lai tylli, ar tylli kiba thymmai bad kawei hap pynduh noh.
Ia ka Maharashtra Institute Technology Meghalaya Amendment Bills 2026, ka bill kaba nyngkong ia ka kyrteng jong u Visitor yn rai da ka nongbei pisa, hynrei kane ka jingpynkylla mynta ka long ba u Visitor yn dei noh u Lat ka jylla katkum ki kyndon ka University Grant Commission, ha ka Board Management ka sorkar kan don noh lai ngut ki ban don ha kane ka board.
Haba ia dei bad ka Mahatma Gandhi University Amendment Bills 2026, ha kane ruh ha ka ain kaba nyngkong ia u Vistors, la rai da kiba bei pisa, hynrei mynta ha kane ka Univesity ruh u visitors yn dei noh u Lat jylla bad ia ka jingdon ki briew na ka sorkar ruh yn kiew noh sha ka lai ngut.
Martin Luther Christian University Amendment Bills 2026, katkum ka ain kaba mynta ka MLCU ka lah ban treikam ruh sha bar jong ka jylla Meghalaya, kumba ka long ka iing dorbar thawain ka jylla kam lah ban ai jingbit ban plie shabar jong ka jylla dei na kane ka daw ba kane ka skul bah kan long beit tang ha Meghalaya. Ha ka ain kaba nyngkong ka MLCU ka lah ban pdiang ia ki Kolej ba kin pyniasoh hynrei katkum ka UGC ka ain kam shah.
Ki don ar tylli ki bill kiba thymmai kata ka, Sister Nivedita University Meghalaya Bills 2026 bad kane kan don ha Byrnihat, kawei ka dei ka Khasi Jaintia Presbyterian University Meghalaya Bills 2026 bad kane kan don ha Sohiong bad ia ka International Open University Repeal Bills 2026 haba ia dei bad kane ia ka bill la pdiang ha u snem 2011 hynrei haduh mynta kam don ka jingsdang kumta la rai ban pynduh noh.
Haba ia dei bad ka jingdawa ka KSU u myntri ka sorkar jylla u bah Wailadmiki u la ong ba ka sorkar kalong kaba la kloi ban ia kren ha kaba ia dei bad ki jingdawa, ka sorkar ka long kaba la kloi ban ia kren ia kino kino ki jingeh.
