Shillong, Nailar 20: U Deputy Commissioner ka East Khasi Hills District u Abhilash Baranwal, IAS u la ong ba ia ka jingbit kaba la ai sha ka KSU ban pynlong ia ka jingiakhih shongkyllain mungor lashai ka sngi 21/Nailar/2026 ha Khyndailad la pyndam noh na ka daw ba la mih ki jingklumar na ka jingiaid paidbah ka bike rally.
Ka sorkar Meghalaya ka ngeit ha kata ka jingsynshar paidbah bad ki nongshong shnong ki don ia ka hok ban pynpaw ia ka jingpyrshah ka jong ki bad ha kane ka kynti kaba mynta kila pan jingbit ban don kata ka jingiaid paidbah kaba jai jai, kumta ka sorkar ruh ka kwah ban ai lad.
Wat la katta ka don ka jingsngew, dei na katta ka daw la buh ia ki pulit ban pahara ha ki jaka jaka bad baroh ki don 200 ngut ei ei, hynrei namar ka jingjrong ka lynti don ki jaka ba duna kila shim kabu ia kata bad kiba la thikna ki don16 ngut ki briew kiba la shah shoh.
U Deputy Commissioner ka East Khasi Hills haba kren ha ki lat pathai khubor u la ong ba ki bor jong ka District kila ai jingbit ban iaid paidbah halor ki kyndon kiba pyrkhing bha ba kin sdang na Jaiaw ha ka por saw baje bad iaid sawdong ka sor Shillong.
Na ka liang jong ka sorkar kala pan san kompany ka kynhun jong ki pulit CRPF bad ki kynhun pulit Rapid Action Force, ryngkat ki pulit district ba kin pynthikna ba kan nym don shuh kano kano ka jingjia bad lada don kiba kwah ban shim ia ka ain ha ka kti kin ngat ha ki kyndon ka ain bad la kyntu ia ki paidbah ban don ka jingiatreilang.
Haba ia dei bad ka jingjia ha ka 19/Nailar/2026 la dep ban ujor da ka ejahar bad ka jingtohkit mynta ka dang iaid, ym lah ban ong ka dei na kano ka liang bad ka jingtohkit kan sa kren ia kiei kiei baroh.
La iathuh ba ha ka por ba ki pulit ki leit sha ophis ka KSU ha Jaiaw la don ba kawang petrol bom, ha kane ka jingjia ki pulit kila pyndon kam u wei u stun grenade bad siat ia ki tyngdong pynsat khmat ban pynpra ia u paidbah kiba pyrshang ban tur sha ki pulit.
