Shillong, Risaw 21: U Myntri Rangbah ka jylla u Conrad K Sangma mynta ka sngi u la ong ba ka jingduna jong ki bank ha ka jylla kala ktah ia ki skhim pynroi la ki dei jong ka sorkar pdeng ne jong ka sorkar jylla ruh kum juh.
U Myntri Rangbah u la kren ia kane ha kaba pynlait paidbah ia ki Micro ATM sha ki Business Correspondent Agent, lyngba ka Meghalaya Rural Bank da ka jingiatreilang bad ka Meghalaya State Rural Livelihoods Society, baroh ki Micro ATM kiba la sdang pyntrei kam da ka MRB ki long 100 tylli.
Ha kane ka sngi u myntri rangbah u la bthah ba hapoh jong u bnai Nohprah mynta u snem dei ban pynbun shuh sa 200 tylli kine ki Micro ATM lyngba ka MRB ban pynsuk ia ki paidbah ha ki nongkyndong kiba jngai na ki bank bad kane kan long ka jingiarap ha kaba pyntrei kam ia ki skhim jong ka sorkar.
U Myntri Rangbah u la ong ba ha kane ka por mynta bun ia ki jingiarap kaba ka sorkar ka ai sha ki paidbah ka long beit online ia kaba la tip kum ka Direct Benefit Transfer, da ka jingdon ia ki Micro ATM kan long ka jingiarap kaba khraw ia ki paidbah khamtam ia ki bai ioh ia ka bai bam tynmen bad kiwei kiwei ki skhim kum ka NERGS.
Kane ka jingiarap ka long kaba don kam bad ia kane lah ban pyntrei lyngba ki seng treilang ia kiba la tip kum ki Self Help Groups, la ong ha u snem 2018 kaba u shimti kum u myntri rangbah ka jylla ki SHG ki don tang 4000 tylli bad mynta kila don haduh 24000 tylli bad u kwah ba shuwa ban kut kane ka por ki dei ban kot sha ka 45000 tylli ki SHG.
Ha ka juh ka por u myntri rangbah u la ong ba ka sorkar ka sngewthuh ia kane ka jingeh ban leh online ba kam biang ka Network dei na kane ka daw ba ha kane ka jylla la ioh ban buh 700 tylli ki Tower mobile bad hapoh mynta u snem un lah ban pyndep ban buh ia kine ki Tower haduh 500 tylli ei ei.
Ka jingthmu jong ka sorkar ka long ban pynsted ha kaba kyntiew ia ka ioh ka kot jong ki paidbah ha ka jylla da kaba ialeh ban pynbiang ia ki kam pynroi khamtam ha ka liang ka Network bad ki surok, ia mynta ki don haduh 500 tylli ki surok PMGSY kiba la pyntrei, ka light ban pynrpoi sha baroh ki shnong bad kane kala kot sha ka 2000 klur.
Ha ka jingkren u bah Hamletson Dohling myntri ba dei peit ia ka tnad pynroi nongkyndong u la ong ba ha ka jylla Meghalaya mynta ki don tang 417 tylli ki bank bad na kine 188 tylli ki don ha ki nongkyndong, ban pyntyllun ia ka kam sha ki nongkyndong don kam ia ki SHG ban ia treilang.
Kiwei kiba la kren ha kane ka jingialang ki long ka Chairman jong ka Meghalaya Rural Bank, u AGM jong ka NABARD, Commissioner Secretary u Sampat kumar, ka wei na ki BCA na Mawkyrwat.
