Shillong, Jymmang 18: Mynta ka sngi 18/Jymmang/2026 ki ar tylli ki seng na Jaintia Hills District kaba kynthup ia ka Jaintia Student union bad ka Jaintia National Council ha ryngkat ki longkmie ki longkpa ki paidbah jong ka shnong Daistong East Jaintia Hills District kila wan sha Shillong ban leit tur sha Secretariat ban pynpaw pyrshah ia ka jingthmu ka Meghalaya State Pollution Control Board ban pynlong ia ka jingsngap paidbah ban buh ia ka M/s Shree Cement Limited ha shnong Daistong.
Ha kane ka sngi kila don palat spah ngut ki dkhot na ka JNC, JSU ki riew paidbha na ka shnong Daistong kila ia lum ha khmat u Mot Kiang Nangbah pyrshah Civil Hospital bad na katei ka jaka kila ia iaid ryngkat ka jingthoh ha ki plakard ban tur sha Secretariat hynrei na ka liang jong ki pulit kila khang lynti noh ha Mawbynna pyrshah ka State Central Library Shillong.
U bah Sambormi Lyngdoh president ka JNC haba kren ha ki lat pathai khubor u la ong ba ka jingpyrshah jong ki ka dei ba kane ka kompeni kam shym la bud ia ki kyndon bad u la kynnoh ruh ba kam shym la burom ia ka Jaintia Hills Autonomous District Council namar kam shym paw ka kyrteng jong ka bad la kynnoh ba ia ki kot ki sla la leh bad pynbiang na ka jylla Gujarat.
U la kynnoh ba kane ka jingleh ka dei ka jingleh donbor ha kaba kam shym don shuh kata ka jingsngap ia ka jingud jingnam ki trai shnong dei halor kane ka nongrim ba ki sa ialeh pyrshah , u president ka JNC u la kren shai ba kane ka jingiakhun mynta ka long pyrshah ia ka sorkar MDA bad lada donkam ba kin leit kanbas pyrshah ha kane ka elekshon MP shiteng samoi kin hap ban leit namar ka jingiakhun ka long pyrshah ia ka sorkar MDA u la ong lada ia ka Taj la lah ban pynsangeh lada ka sorkar ka don ka mon ka lah ban pynsangeh ia ka jingsngap paidbah bala buh ban long 22/Jymmang/2026.
