Shillong Jymmang 19: ka jingialang kaba la khot mynta ka sngi haka ba la don lang U myntri rangbah ka jylla u Conrad K. Sangma bad ka kynhun myntri, u nongialam ka liang pyrshah u Dr. Mukul Sangma ryngkat ki MLA.
Ka jingiakren ha kane ka jingialang ka long halor ka jingkiew kiba ioh ia kane ka jingpang covid , lah ong u bah Metbah Shongknor ka iing dorbar thawain ka jylla.
Haba iakren bad ki lad pathai khubor u bah Metbah uba dei u Shongknor ka iing dorbar thawain u la ong ba ha kine ki khyndiat sngi ka la don ka jingkiew shisha ha ki briew kiba ioh covid-19 bad kiba la khlad ruh kumjuh ha kine ki khyndiat taiew.
Ha kane ka jingiakynduh lang mynta ka sngi la ia thir halor, kumno ban leh ban pynbna iaki jaka ban khang dam, ban buh bad pynbiang iaki tyndong oxygen, ban pynbiang shuh shuh ki jingthiah ha ki jaka sumar jong ka sorkar, ki jaka ba la buh da ki shnong ki thaw ha kane ka jingialeh iakane ka khlam covid-19.
U shongknor u la pynpaw ba kane ka jingialang ka long shisha kaba seisoh namar ba ka la don ka jingiakren na ka liang ka sorkar ban pynsngew ia kaei kaba ka lah leh bad hakajuh ka por na ka liang ki MLA ki lah pynsngew bad ai jingmut ruh kumjuh iaka sorkar kumno ban leh ban iada na ka jingsaphriang kane ka jingpang ia kaba ka sorkar ka la pdiang ia ka jingai jingmut.
Na ka liang u bah Metbah u kyntu bad kyrpad ia ki paidbah nongshong shnong ba kin long kiba jai jai, ban iada iakane ka jingpang la kyntu ia ki paidbah ba kin leit ai Tika khnang ban lah ban leh pyrshah ia kane ka jingpang.
La kyntu ia ki khlieh nongsynshar shnong, ki balang, ki sengbhalang bapher bapher ban iatrei lang hakane ka jingialeh pyrshah iakane ka khlam.
