Shillong Naitung 95 : Ka National People’s Party Farmer’s Front State Unit dang shen mynta u bnai ka pynlong iaka jingialang kaba nyngkong ha ka Mawkynrew constituency ha ïing Dorbar Shnong Maw u Sam.
Ha kane ka jingialang la ioh ruh ban pyntip ia ki kyrteng jong ki nongkitkam jong ka NPP Farmer’s Front jong ka Mawkynrew Block hakane ka sngi la don lang ruh u Bah Banteidor Lyngdoh MLA jong ka thaiñ, u Bah Himalaya M Shangpliang Chairman jong ka Farmer’s Front bad ki nongkitkam jong ki District nalor ki nongkitkam jong ki block kiba hap hapoh ka East Khasi Hills District.
Haba ai jingkren ki nongïalam ka NPP Farmer’s Front kynthup ïa u Bah HM Shangpliang bad Secretary Bah Egenstar Kurkalang, bad u MLA ka Mawkynrew Bah Banteidor ki la ïathuh ba kane ka dawai sboh namar ba la bun ki nong Mawkynrew hi ki la ioh license retailer ban Supply ha ki thaiñ block Mawkynrew hi baroh bad kin sa pynpoi sha ki paidbah kiba kwah ïa kine ki dawai sboh,
Haba pynpaw pat halor ka skim CM Assure kaba dei kyrpang na ka bynta ki nongrep synsar haba hiar ka dor ha iew, na ka liang u Chairman ka Farmer’s Front, Bah HM Shangpliang u la ïathuh ba ha ka jingïalang ha kane ka sngi, ki nongrep ki la ud ba ka jingshim jong ka sorkar tang 800 kilo u synsar kam pat biang satia namar ki don da ki hajar kilo kiba la hap ban duh ei.
“La pyntip ba bun ki paidbah kim pat tip shaphang kane ka skim bad don ruh kiba kyrpad ba ka sorkar kan shim khambun u synsar bad ruh ban kyntiew shuh ka dor khnang ba ki nongrep kin ym duhnong,” u la ong.
La ïathuh ba katkum ka dor synsar ba ka sorkar ka shim, ïa u Grade A ka sorkar lyngba ka skim CM Assure la thied ha ka dor 55 tyngka shi kilo, nangta ïa u Grade B ha ka dor 40 tyngka bad ïa u Grade C ha ka dor ba 30 tyngka shi kilo. Halor kane, kila rai ban rah sha ka sorkar ban pynsngew ïa kane ban kyrpad ban shim kham bun kilo shuh u synsar bad ruh ïa ka dor,”
Ha kajuh ka por u la ïathuh ba ka la don ka jingud halor ka jingslem palat ban rejistar hynrei naka liang jong ka Front kan sa leh kham kloi noh naka bynta ban register iaki Nongrep khnang ban ioh shibun ki jingmyntoi naka bynta ka rep ka riang haka jylla Meghalaya.
U Bah Banteidor u la pyntip ba na ka liang ka party ryngkat ka jingiatrei lang bad ki nongrep na ka thain Mawkynrew kin sa ia kynduh biang ban pynsngew pat ia ka jingeh ba ki nongrep na ka thain ki kynduh haduh shkor jong u Myntri Rangbah.
Ha kane kajuh ka sngi, ka Farmers Front ka la pynskhem ruh ïa ki nongkitkam jong ki distrik na bynta ki disrtrik jong ka rilum Khasi ryngkat ka jingbthah pat ba kin thaw ïa ka komiti ha ki block kiban don ha man la ki constituency khnang ba kin lah ban peit pat ïa ka jingeh jong ki nongrep.
