Shillong, Jylliew 06: U bah A L Hek myntri jong ka sorkar Meghalaya ba dei na ka party BJP u la ong ba “Hoid donkam ia ka jingtohkit da ka CBI ha kano kano ka jingjia ban lap ia ka jingshisha pynpaw halor ka jingjia ba jah ki arngut ki nongwan jngoh kai pyrthei ha sohra.
U nongialam ka BJP u bah AL Hek u la ong ba na ka liang ki pulit jong ka jylla, ka DC bad ka Administration ki la leh katba lah ban leh ban pynlongn ia ka jingwat ia ki briew ki ba jah ha sohra.
U la ong, hadien ba ka jia kane ka jingjia ka jia ha ka 23 tarik jymmang na ka liang jongu, dalade hi u la hiar sha sohra ha ka 24 tarik jymmang hadien ba la bthah ia u da ki MLA ka BJP napoh Madhya Pradesh, u la ong ba u la pynlong ia ka jingiakynduh lang hapdeng ki hima,
Ki briew ka hima, ki khun samla jong ka thaiñ Sohra na bynta ban pynlong ia ka jingwat ia ki briew ba la jah, hynrei, kaba sngewsih ka long ba don katto katne ki National media kiba la pynbud nama ia ka jylla Meghalaya, kaba ngin nym lah ban pdiang ia ka jingkren jong ki.
Shuh shuh u bah AL Hek u la ong ba ki la don ki jingthoh ba ki ong ba “u khlem iap, hynrei u la shah pyniap” kane ka long kaba bakla shibun, ka lah ban long ba u shah pyniap hynrei, ai ba kane ka kam ki pulit bad ki ba dei ban leh ia kane k bynta kin pyndep shuwa ka kam ban wad ia ka jingshisha.
“Ban shu kynnoh ba baroh ki nong Meghalaya ki dei ki nongpyniap briew, ki ba sniew” kane te ka bym lah ban pdiang u bah Hek u la pynskan da kaba u la ong ba da ki hajar ngut ki nongwan jngohkai pyrthei ki tuid man ka shi hapoh Meghalaya kam ju don kum kane ka jingjia, lait noh tyngkhad eh, ba lah ban dei na kaba ki bakla hi dalade bad da kino kino ki daw.
“Ngi Pynrem ia kum kum kine ki jait jingkynnoh ia ka jylla Meghalaya” u la ong. U la kren shai ia ka sorkar jylla Madhya Pradesh bad ia ka sorkar pdeng ba kam don kano kano kaba ki nong Meghalaya kin pyrshah ia ki nongwan jngohkai pyrthei hapoh ka jylla”.
“ngi long ki ba pdiang sngewbha ia ki briew ki ba wan nabar, kiba wan na ka bynta ban wan jngohkai pyrthei hapoh ka jylla jong ngi, hynrei ba phin kynnoh ba ngi dei kiba sniew ngin nym lah ban pdiang da lei lei ruh” La ong u bah Hek.
