Shillong, Kyllalyngkot 23: Ka HYC-CEC ka pyrshah jur ïa ka jingkren ba la pynmih da ka kynhun shit niam Hindu “ Kutumba Surakshya Parishad (KSP)” ba ka ‘jingpyrshah jong ka kynhun Khristan’ ka la wanrah ïa ka jingïakynad ha Mawkynrew dang shen halor ka jingshna ïa ka ïing Skul.
Katkum ka kyrwoh khubor ba la phah da u President jong ka HYC seng kmie u la ong, ‘Kine ki jait jingkren kim dei ei ei hynrei ka jingpyrshang jong kane ka kynhun ban bet ia u symbai jong ka jingiapher jaitbynriew ha ka Jylla jong ngi bad ban ring dur bakla ia ki jingjia baroh kawei khlem da pynshisha ia ki jingshisha bad kumta dei ban pynrem da baroh.
“Ka KSP ka dei ban kiar na kaba kren khlem jingkitkhlieh namar kane kan don ka jingktah kaba jngai bha ia ka jingiashong suk lang jong ki jingngeit bad ki jaitbynriew bapher bapher ha ka Jylla jong ngi” u la ong.
Shuh shuh u Bah Roy u la ong, Ha ka jingshisha ka KSP kam dei ban peit ia baroh kaba la jia ha ka Jylla Meghalaya kum ka jingpyrshah ia ki Hindu bad ka pynkut ba ka dei ka jingthmu jong ki katto katne ki kynhun niam pyrshah ia kano kano ka niam kyrpang.
Shuh shuh u la ong ba ka seng ka kyntu ruh ia ki ba kin sangeh noh ban tuklar palat ia ki kam jong ka Jylla jong ngi.
