Shillong, Jymmang 18: Ka long kaei kaei kaba pynjyndit ia kiba kwah ban shim ia ka kam ri sniang kum ka lat kamai ja kpoh ba ka “Piggery Mission” kaba ka sorkar kala pyntrei kam shuwa ka elekshon MLA 2023 kala kut ha u snem 2022.
Haba kila don ki briew kiba leit ban wat jingtip ban pan jingiarap ban ioh ia ka ram ban ri sniang na ophis jong District Veterinary Officer ban ri sniang, la ioh pynbna ia ka jubab ba kane ka skhim kam don shuh naduh u snem 2022.
Kane kala pynkyndit ia kito kiba la leit ban wat ia kane ka skhim, la ong ba naduh bala sdang ia kane ka skhim ha u Naiwieng 2020, ka jingmang pisa na ka bynta kane ka skhim ka long 209 klur, ka jingthmu jong ka ka long ban pynmih ia ka doh sniang na kane ka jylla.
Katkum ka jingpynkhreh ka sorkar ia kane a skhim la ong ba ha lai snem ban wan naduh bala sdang ia ka ka long ba pynmih ia ki sniang na kane ka jylla namar ka jylla ha ka shisnem ka hap ban thied sniang na shabar haduh T.150 klur tyngka ha shisnem.
La pynsngewthuh ba ka jingpyntrei kam ia kane ka skhim ka la iaid ka bynta kaba nyngkong, ka bynta kaba ar bad ka bynta kaba lai kaba dang sah kut haduh mynta, la ong ba ha kane ka bynta kaba lai ki don kiba la mih kyrteng hynrei haduh mynta ka sorkar ka khlem pynlait pisa shuh.
