Shillong, Jylliew 15: Ka Sorkar Jylla ka la khot lang ia ki nongialam Balang ban ia don bynta ha ka jingialang ba la khot pynlong da u myntri ka tnad Social Welfare u bah Paul Lyngdoh ban pynlong ia ka jingiakren halor ka jingiakhun ia ka thma pyrshah ia u droks hapoh ka Jylla bad ka la mang T. 10 klur shisnem ban pyndonkam ha kane ka thma.
Haba iakren bad ki nongthoh khubor, u Bah Paul Lyngdoh u la ong ba la don shibun ki jingmut ba la mih na kane ka jingialang kaba la iatai halor ka jingdonkam ban pynkhlain ia ka jingiakhun pyrshah ia ka jingjyllei u droks.
La don ruh ka jingai jingmut halor ka jingdonkam ban pynbun ia ki jaka iasyllok, ki jingpynsngewthuh paitbah bad ban tehlakam ia ka jingpynbit thit ia ki nongdih droks.
U bah Paul Lyngdoh u la iathuh “Kum u soh ba mih na ka jingiakren, ngi la mynjur ban iaid ha ki arbynta jong ka jingiakhun. Kaba nyngkong ka long ban pyniadon bynta lang ia ki Balang bapher bapher ba kin iasnohkti lang ha ka jingiakhun pyrshah ia u drok”
U bah Paul Lyngdoh ula ong ba ia mynta, ka Sorkar kan sa buh ia ka mang tyngka kaba T. 10 klur ban ai sha ki Balang ba kin pyndonkam ha ka ban rat dyngkong ia u droks bad ka jingdih droks.
U Bah Paul u pyntip ba la kyrpad ruh ia ki Balang ba kin pynlong lem ia ka jingiasyllok ia kane ka kam hala iing bad u la ong shuh shuh ba “Ngin sa pynshong nongrim kat kum ka jingdonkam jong ki ban mang pisa ia ka jingialap paidbah”.
Nalor kane, u bah Paul Lyngdoh u la kyrpad ruh ba naba bun ki skul ki ba dei jong ki Balang, dei ban kyntu ia ki Khynnah skul ba kin shim smai manla ka sngi ba kin ym ngop ialade lane don bynta ha ki kam kiba lah ban lam sha ka jingkyrni dih droks.
Shuh shuh une u Myntri ula ong ba ka Sorkar Jylla ka la rai ruh ban pynkhlain ia ka jingialap pyrshah droks ha baroh ki hynriew tylli ki District kiba la ithuh kum ki ‘drug hotspot’ lem bad kiwei kiwei ki District ka Jylla.
U Bah Paul Lyngdoh u iathuh ba ki Nongialam niam kin sa pynlong ka jingshong jingialang ha ka 19 tarik Jylliew bad hadien kane, kin sa wan sha ka Sorkar ryngkat ki jingtyrwa jong ki.
U bah Paul Lyngdoh u la kular ruh ba ka Tnad Social Welfare kan sa pynlong ruh ia ka jingialang kaba lai ban khot iadonlang ia ki Dorbar Shnong bad ki Senghalang ban iatai halor kane ka kam.
Halor ka jingdonkam ban pynbun ia ki Rahabilitation Centre, u Myntri ula ong ba ka Tnad Social Welfare ka la bei pisa bad kyrshan ia 11 tylli ki deaddiction centre u la bynrap ba ka la don ruh ka jingtyrwa ban pynkha sa saw tylli ki centre ba thymmai.
