New Delhi, Kyllalyngkot 31: Ka sorkar India ka la wanrah ki jingpynbeit ban pynmih noh ia 366 ngut ki nongshong shnong jong ka ri na nongbah Wuhan ha kaba iadei bad ki jinglong jingman ba kyrkieh ba la mih namar ka jingsapriang ka jingpang Novel Coronavirus ha China.
La phah ia ka kynhun ki doctor, ki riewshemphang ha ka koit ka khiah bad ki nongtrei jong ka koit ka khiah da ka liengsuin jong ka AI. Ia ki nong India ki ban wan na China yn buh ha ka jingpeit sani kumba 14 sngi ha ki artylli ki Quarantine Centre ba la plie ha Manesar bala pynaiid da ka Armed Forces Medical Services bad Chawla Camp ba la pynaiid da ka ITBP. Ia baroh ki shynrang kiba don 280 ngut yn phah sha Manesar Camp bad kiba ha iing, ki kynthei kumba 90 ngut yn phah ha ITBP camp.
Lada lap ia uno uno u briew ba shah ktah ha ka jingpang Novel Coronavirus, yn pynkynriah ia u ne ka sha ka hospital ba la pynbeit na ka bynta ka jingtohkit shuh shuh bad ka jingsumar. Ha kum kata, yn sa peit lada donkam ne em ban buh la ka jong ia kiba suba ba la ioh ia kane ka jingpang.
U Dr. Rajiv Garg, DGHS un long u Nodal Officer na ka Tnad ka Koit ka Khiah jong ka Sorkar Pdeng ban khmih ia ki jingpynkhreh baroh ha ITBP. Na ka bynta ki kynhun ka koit ka khiah ha Manesar Camp la khmih da ka AFMS.
Yn pynbiang ia ki jingdonkam baroh ba iadei bad ka koit ka khiah da ka kynhun ki doctor ha baroh artylli kine ki Centre. Nalor kane, la plie ruh ia ka jaka sumar kaba 50 jingthiah ha Safdurjung Hospital ha Delhi na ka bynta ka jingsumar bniah ia ki nongpang. Yn peitngor bha ia baroh ki briew kiba don ha baroh artylli kine ki Centre man ka sngi haduh 14 sngi.
Yn phah ia u nodal officer na man la ka Ministry of Home Affairs, Ministry of Defence bad Ministry of External Affairs na ka bynta ka jingbit jingbiang ha ka jingtreikam. Yn shna ia ka WhatsApp group jong baroh kine ki ophisar ryngkat bad ki Nodal Officer jong ki Camp na ka bynta ka jingiakren kaba iaid beit iaid ryntih.
