Ampati, Naitung 07: Ka tnat thungsoh bad kba, South West Garo Hills, kala thmu ban pynmih iaki skhim rep bun tylli kiba bapher bapher kaba ioh jingkyrshan na ka sorkar kmie bad sorkar jylla da kaba sam iaki tiar rep tiar riang bad ki jingdonkam na ka bynta ka rep ka riang sha ki nongrep kiba ioh jingmyntoi ha kylleng ki katto katne ki shnong ha kane ka distrik.
Ki nongrep kila ioh iaki symbai jhur, dawai ban kynshait ha ki jhur, ki symbai soh ki soh bapher bapher, ki tiar ban thung ia u sohmarit bad kiwei kiwei ki tiar rep tiar riang na kane ka skhim, napdeng kitei ki tiar rep kane ka skhim kala thmu ban pynbiang iaka rukom thung iaki jhur, thung soh bad kiwei kiwei ki jingthung ki bym ai dawai.
Kane ka skhim jong u Myntri Rangbah ne ka Chief Minister’s Farm Plus Scheme kala sam iaki katto katne ki tiar thung jingthung, kynthup ia u sohmarit, cashew bad cinnamon sha ki nongioh jingmyntoi ha ki shnong kum ka Raksanara, Kalaichar, Balughat, Josipara, Merenggipara, Chibongnara, Taranara bad Garagre.
La bynrap ba hapoh ka Centrally Sponsored Mission for Integrated Development of Horticulture (MIDH), ka pynioh iaki tiar ban thung ia u soh dragon sha ki nongioh jingmyntoi ha Kumligaon.
Kane ka skhim kaba dei kum shi bynta jong ka sorkar ka trei shitom ban bteng ban kyntiew ia ka rep ka riang ban pynbun jait ka ioh ka kot na ka rep bad bad ban pynkhlain ka lad ka lynti ban ioh pisa ki nongrep ha kylleng ka South West Garo Hills.
