Shillong, Jylliew 15: Mynta ka sngi ka seng HANM hapoh ka jingalang jong u President bah Lamphrang Kharbani bad u General Secretary u bah Kyllang Thongni kila leit ban ia kynduh ia u bah Paul Lyngdoh Myntri ka sorkar Meghalaya bad ba dei ruh u shongknor ka “Regional Committee” kam pud kam sam ba dei ia ka West Khasi Hills District.
Haba kren ha ki Lat pathai khubor ha dien ka jngiakynduh bad u myntri ka sorkar jylla u General Secretary bah Kyllang Thongi la ong ba ka sorkar Meghalaya kam dei ban shu sngap katba ong ka sorkar Assam, namar ha Langpih ki jaka ba hap ha Meghalaya la shongda kiwei ki jaidbynriew kiba kwah ban leit sha Assam ia kaba ka seng kam kwah ban iohi ba ka jaka kan duh noh.
Ha kane ka kylla kaba ar jong ka jingiakren kam pud bad ka jylla Assam, haba phai sha ka thain jong ka West Khasi Hills District, kaba la bynshed haphi kum u ‘Chairman ka Regional Committee’ u sngewthuh shaikdar ba ka dei ka thain Langpih kaba don ha ka jingiakam kaba mar kylliang.
Ha kane ka thain kala don ruh ki jingjia kiba sngewsih kaba la wan rah ia ka jingduh ei ia ki mynsiem briew, ba kum ka seng kam kwah shuh ban iohi ba kum kine ki jingjia kin dang jia ha katei ka thain.
Na ka liang jong ka seng ka kwah ban kyntu ia phi kum u “Chairman ka Regional Committee” ba phin ia kynduh ia ki nongsynshar hima katei ka thian, ki rangbah shnong, ki Molor, kum juh na ki riew rangbah kiba la don ha katei ka thain naduh shuwa ban ioh ka jylla Meghalaya.
Ban ioh ia ka jingtip kaba bniah, ka seng ka sngewthuh ba phin sa leit sha katei ka thain ban ia kynduh ia ki paidbah ban sngewthuh ia ka jingmut jingpyrkhat jong ki sha no ki kwah ban don.
Na ka liang jong ka seng ka kwah ba ha kane ka jingiakren pynbeit pud ka sorkar Meghalaya kam dei ban shu kongnguh ia kaei kaba ka sorkar Assam kan kren, namar ka Thain Langpih bun na ki jaka kiba hap hapoh ka jylla Meghalaya la wan buhai shnong da kiwei ki jaidbynriew bad ia kine dei ban dawa na ka sorkar Assam ba kin shim noh ia ki sha Assam kim dei ban don ha Meghalaya namar ki juh pynmih ia ki jingklumar ha katei ka thain.
Na ka liang jong ka seng ka kyntu ruh ia phi kum u “Chairman ka Regional Committee” ban shim ia kane ka kabu ba phin ia kren bad ka sorkar Meghalaya weng ia ki briew kiba don ar tylli ki kyrteng ha ka Electoral Roll, ka jingeh kaba mih ha kane ka jingiaka jia pud ha Langpih ka dei ba ki bym dei Khasi ki don ar tylli ki EPIC kawei ha Meghalaya bad kawei ha Assam.
Kaane ka jingdon don ar tylli ki kyrteng da kaba ki shu punkylla shidak ia ka kyrteng ka jaid hynrei dei juh u ne ka juh breiw kane ka ktah ia ka jingpynbeit pud namar ki juh ki briew ki shong ha ki ar tylli ki jylla.
Ka seng ka kyntu lyngba jong phi ban ia kren bad ka sorkar jylla sha ka Election Commission jong ka Ri India ban thung ia ka kynhun tohkit ban lah ban weng noh ia ki ba don EPIC ar tylli ki kyrteng ha ka electoral Roll kan wanrah ban ioh ia ka jingpynbeit pud kaba shai kdar ha ka thain Langpih.
