Shillong, Nohprah 21: Ka Sorkar India ka dei ban sngewthuh ia ka Riti Dustur kaba don hapoh ki Hima Khasi – ha ba para Hima Khasi ruh ngi da don ki ain kiba phyrkhing kiba lah ban iasyriem kum ka ILP namar ngi don ki kyndon jinglong nongshong shnong kiba la lah ban ong citizenship act jong ki Hima Khasi.
Ki Hima Khasi ki khien, u khun u hajar ii) u khun shoh shnong, iii) u khun soh syiem iv) u raiot v) u dkho bad kitei ki kyntien ki la dep paw ha ki katto katne ki Rule Hima kiba la dep mynjur da u Lat ka jylla.
Kaba sah ka long ban ioh ki bor KHADC kiba sngewthuh ban phyrkhing pyntreikam ia kitei ki Rule hapoh Hima Mylliem bad kiwei kiwei ki Hima ha kaba la dep ban pynjanri bad mynjur ia ki Act bad ki Rule.
Ka dei ha kum kane ka por ba ki sngew dei ban pynsngew ia ka jingdonkam ia ki bor KHADC ban lum pynjanai ia ka Hima shong pdeng da kaba lum ia ka Dorbar Hima ban ia shai uei u Raiot uwei u Dkho ban ia sngewthuh katno ngut ki nongwei kiba don kiba ioh pata hapoh ka Hima Mylliem bad kiwei ki Hima ba shong khleh ha kaba ki Raiot ki hap ban pynthymmai man ka snem.
kaei ka policy jong ka Hima Mylliem lane ka KHADC halor u Raoit namar katkum ka Riti Dustur kim don hok ban don jaka ki long tang kum ki nongshong wai, haba kumta ha kano ka dur mih haduh katne ngut kita ki Raiot balei ki bor KHADC kim shim khia halor kane, balei ki MDC ki MLA Hima Mylliem ki juh ia kynduh ban ia kren halor ka Act ka Rule Hima Mylliem katba ha kawei ka liang ngi ia pyrta ILP.
Ka jingong ka ktien phareng ” charity begin at home” “sdang shwa ia ka kam treimon sngewbha na la iing” ka da don ka jingmut kaba khia namar ngi la dier por ban pynjanai ia ki Act ki Rule jong ka Hima Mylliem mynta ka sah sa kumno ba ki bor KHADC kin syrdep ia kaba la pei da kaba lum tikna ia ka Dorbar Hima Mylliem bad kiwei ki Hima kiba bun ka jingshong khleh.
Ka ILP ka long kawei na ki lad jingiada ngin dang donkam bun ki lad jingiada bad ka jingpynjanai ia ka jinglum Dorbar Kur, Dorbar Shnong Dorbar Raid bad Dorbar Hima kan long kawei na ki lad jingiada kiban nang pynskhem ia ka nongrim jingdawa ILP.
Shuh shuh ka Sorkar India ka dei ban kynmaw ba ka jingdonkam ILP ka long ba ki Hima Khasi States lane ka Federation of Khasi States kim shym soi ia ka Instrument of Merger haduh kine ki sngi namar ki soi tang ia ka Instrument of Accession bad ki kyn don Annexed Agreement ba la mynjur bad soi da u Governor General of India u Shri. C Rajagopalachari, ha ka 17 tarik August 1948.
Bad ki 60 ngut ki MLA bad ki 3 ngut ki MP ki la dei ban hiar shuki ban pynlong biang ia ka election bad ban hiar biang ban pynlong ia ka election kumba ialeh por Hill State tad haduh ba ka Sorkar India kan burom ia ka sur ki paidbah kaba la mih lyn gba kata kaba ki ong ka synshar paidbah ha ka Assembly lyngba ka resolution. Lada ka Sorkar India kam burom ia resolution jong ka Meghalaya Assembly ka paw ba ka jingioh jylla kam don jingmut.
