Shillong, Jymmang 7: U Chief Executive Member ka KHADC u bah Winston Tony Lyngdoh u la khot ia ka jingiakren bad ki nongialam ka Hima Sohra ban iakren halor ka jingdawa ka jong ki ban ai sanad ia u syiem ka hima kaba kila jied u bah Maremdor Syiem.
Ha kane ka jingiakren na ka liang jong ka hima kala sei iala ki nia ki jutang katkum ki riti ki dustur kiba ia dei bad ka jingjied ia u syiem kmie ka hima bad ha kajuh ka por na ka liang u CEM, u Em ba dei peit ia ka Elaka, u Em ba dei peit ia ka khyndew kiba la ia don lang ha kane ka jingiakren kila ong ia ki nongialam ba mynta ka sngi kim pat lah ban ai ia ka sanad bad kin sa ia peit.
Ha kane ka jingiakren la mih ka kyrteng jong u bah P. Syiem ba shong ba sah sha Mairang u ba la leit kam ba u ruh u don ia ka hok ban ialeh syiem ia kane la pynpaw da u EM ba dei peit ia ka tnad Elaka ha ka jingiakren bad ki nongialam ka Hima Sohra ha kaba kum ka hima kam don jingtip shaphang kata.
Ha kane ka jingiakren na ka liang ka Executive Committee kala kren shai ba ia mynta kin dang hap ban peit bniah haba ia dei bad kane ka kam hapoh ka Hima Sohra ia ka jingdawa ban ai sanad kin sa dang ia peit.
Na ka liang jong ka hima kila kren shai ba kila dep ban pyndep katkum ka riti ka dustur ha kaba jied ia u syiem bad kaba sah mynta ki dawa ia ka sanad ba ka District Council kan ai sha u syiem u ba ka hima kala jied ka hima kam ithuh ia u ta u P. Syiem u ba ka Executive Committee ka pynpaw ha kane ka jingiakynduh.
