Shillong, Naiwieng 22: Ha ka jingiaid jied ia u Chief Executive Member jong ka Khasi Hills Autonomous District ka kynhun United Democratic Alliance (UDA) kaba kynthup ia ka UDP, HSPDP bad shiteng ki MDC jong ka NPP ki khlem poi sha iing dorbar ban ia jied ia u CEM ba thymmai.
U Bah Pynshngianlang Syiem lamphang jong ka iing dorbar u la pyniaid sha khmat ia ka jingjied ia u CEM ba thymmai katkum ka jingpynbna kaba la dep ban buh ba kane ka sngi ka dei ka sngi ban jied ia u CEM ba thymmai jong ka KHADC ha dien ba ka EC jong u bah Teinwell Dkhar kala khyllem na ka mat bymdon jingshaniah shuh kaba la wanrah da u bah Lamphrang Blah jong ka Congress.
Wat la ka liang jong ka kynhun UDA kam shym la kren ha ki lad pathai khubor hynrei la sngewthuh ba ar ngut na ki MDC kiba don ha ka UDA u Bah Gigur Myrthong bad u bah Lambor Malangniang kiba dei ki MLA bad MDC kim shym la poi sha iing dorbar mynta ka sngi.
Kiwei ki MDC jong ka UDA ki ai don hapoh jong ka ophis jong ka District Council hynrei kim shym wan rung pat hapoh iing dorbar. Ki shuki kiba don ha ka liang synshar kila thylli namar ym shym don ba wan ban ia shim bynta wat tang ban ai khublei ia u CEM ba dang shu shah jied.
