Shillong, Rymphang 09: Ia u dur mot ba shiryngieng jong u Syiem Tirot Sing ka Hima Nongkhlaw bala pynieng ha Dhaka yn plie paidbah da u Symbut myntri rangbah ka jylla u bah Sniawbhalang Dhar ha ka jingiadon lang ruh kiwei ki myntri sorkar.
Ka jingplie ia u dur mot kan long ha ka 16/2/2024, na ka liang jong ka tnad pynneh pynsah ia ka riti dustur ka la khot saw tylli ki hima ban ia don lang ha katei ka sngi ban ia sakhi lang ba ia u dur mot jong u Syiem ka hima Nongkhlaw la tei ha ka jaka kaba u la khlad ha ka jingshah set ha ki phareng.
Ki saw tylli ki hima kiba la shah khot ki long ka Hima Bhowal, ka Hima Mylliem, Hima Khyrim bad ka trai hima ka Hima Nongkhlaw, ha kane ka leit la sngewthuh ba la khot lang ruh ia ki dkhot ka Executive Committee jong ka KHADC ban ia don lang ha katei ka sngi.
Ka jingtei ia u mot ba shirynieng jong u Syiem ka Hima Nongkhlaw ha Dhaka jong ka Ri Bangladesh mynta la pynbit pynbiang da ka tnad pynneh pynsah riti dustur jong ka sorkar Meghalaya ryngkat ka jingiadon kti lang ka sorkar pdeng ha kaba la lah ban pyndep ia kane ka kam.
U bah Fredric Roy Kharkongor Commissioner Secretary ba dei peit ia ka tnad pynneh pynsah riti dustur la iathuh ba ka jingplie ia u dur mot ba shirynieng jong u Syiem Tirot Sing kan long ha ka 16/2/2024 kumba la dep ban pynbeit.
