Shillong, Lber 11:U Myntri ba dei peit ia ki kam pynroi sor u bah Sniawbhalang Dhar haba jubab ia ka jingkylli la wanrah da u bah Adelbert Nongrum la iathuh ba naduh u snem 2014 haduh mynta ki kynhun iatreilang ha ki jaka sor ki don tang 510 tylli bad na kine 41 tylli kim shim la treikam shuh.
U Myntri u la pyntip ruh hapoh ka iing dorbar ba ia kine ki kynhun iatreilang lyngba ka skhim Deendayal Antyodaya Yojana – National Urban Livelihood Mission(DAY-NULM)ka sorkar ka ai T. 10,000 hajar tyngka kum ka bai seng ba kin sdang ia ka kam kaba ki mut ban trei.
Haba jubab ia ka jingkylli bynrap u myntri u la iathuh ba mynta Ka sorkar pdeng kala pyntip ba kala mynjur ba ia kane ka skhim DAY-NULM kan sa pynkiew noh ia ka jingiarap pisa na ka T. 10,000 tyngka sha ka T.25,000 tyngka.
U Myntri rangbah ka jylla haba ai jubab ia ki jingkylli bynrap la ong ba ia ki seng iatreilang ne ki kynhun iatreilang sha ki nongkyndong ka jingai jingiarap ka long tang T.2500 tyngka hynrei ka ai pat kumba T.1,10,000 tyngka kum ka bai seng kam.
Kine baroh ar tylli ki skhim NRLM bad ka NULM ki dei ki skhim jong ka sorkar pdeng kim dei jong ka sorkar jylla, lyngba jong kine ki skhim bun ki riew kynthei ki la lah ban kamai palat lak ha ka shisnem da ka jingioh ia kitei ki skhim.
