Shillong, Nohprah 18: U Myntri rangbah ka jylla Meghalaya u Conrad K Sangma haba kren ha ka jingialang paidbah ha madan polo ha ka jingiadon lang u myntri rangbah duh jong ka Ri India u Narendra Modi, u myntri kam poh iing ka Ri India u Amit Shah u la ong ba ki paidbah ka jylla Meghalaya ki angnud ba ia ka ktien Khasi bad Garo dei ban pynurng noh ha ka khyrngit kaba phra ka riti synshar jong ka Ri Indian.
Ban pynlait ia ka jingkhap ngiah ia kane ka sor Shillong, ka sorkar kala sdang pynkynriah ia ki ophis sorkar sha New Shillong Twonship, ki jaka pule, ki jingialehkai , kane ka long ban pynlait ia ka jingkhap ngiah kane ka nongbah Shillong, haba ia dei bad kane ka jingdon kam ka sorkar ka don kam ia ka jingkyrshan na ka sorkar pdeng.
U Myntri Rangbah ka jylla u Conrad K Sangma u la pynpaw ia ka jingsngewnguh ia u myntri rangbah duh jong ka Ri India u ba la juh kdew lynti kumno ban kyntiew ia ka jylla bad jingkyrshan jong u ia kane ka thain bad ka jingialeh u myntri rangbah duh ka Ri India ban kyntiew ia ka Ri ha baroh ki liang.
Haba phai sha ki kam pynroi kiba la pyntrei ha ka jylla, la kdew ba naduh u snem 2013- 2018 ka jingpynlut ka sorkar ka long tang T.8,400 klur tyngka, katba naduh u snem 2018-2022 ka jingpynlut ka sorkar ha ki kam pynroi kala kiew sha ka T.14,500 klur tyngka. Ha kane ka sngi la kdew ruh ai ki kam pynroi kiba la pyntrei ha ka jylla.
U Myntri rangbah ka jylla u la pynpaw ba kane ka sorkar jong u ka phai khmat kyrpang sha ki khun samla ban kyntiew ia ki ha kiba bun ki liang ba kin lah ban ieng hala ki jong ki kjat katkum ka sap kaba ki don. Ka sorkar kala pyntrei ruh shibun ki skhim ha ka jylla ban kyntiew ia ka ioh ka kot.
U myntri rangbah la ong ba kane ka jingwan jong u mytnri rangbah duh sha Meghalaya ka don ka jingmut kaba khraw ia ka jylla, namar mynta ka sngi la plie da u myntri rangbah duh jong ka Ri India u la plie shibun ki kam pynroi bad ha ka juh ka por u la buh mawnongrim ruh ai ki skhim ban pyntrei ha kane ka jylla ha kane ka sngi ba rakhe ia ka jingdap 50 snem ka NEC.
U myntri rangbah ka jylla, u la ai khublei ia u lat ka jyla u Brig. (Dr.) B. D. Mishra (Retd.) u myntri ka DoNER u Vice Chairman, NEC, u G. Kishan Reddy, u myntri ka tnad ain u Kiren Rijiju, u myntri ba dei peit ia ka tnad kad jhad u Sarbanada Sonowal.
Ia u Lat ka jylla Assam bad Nagaland, Prof. Jagdish Mukhi, u Lat jylla Manipur La Ganesan , U lat ka jylla Mizoram Dr. Haribabu Kambhampati, u Lat ka jylla Sikkim u Ganga Prasad, u Lat ka jylla Tripura, u Satyadeo Narain Arya .
La ai khublei ruhia u myntri rangbah ka jylla Arunachal Pradesh, u Prema Khandu, myntri rangbah ka jylla Assam u Himanta Biswas Sharma, u myntri rangbah ka jylla Manipur u N. Biren Singh, u myntri rangbah kajylla Mizoram, u Pu Zormathanga, u myntri rangbah ka jylla Sikkim, u P. S. Golay, u myntri rangbah ka jylla Tripura u Dr. Manik Saha .
Kiwei ki myntri ka sorkar pdeng kiba la ia don lang ha kane ka sngi ki long u myntri khynnah ka DoNER u B. L. Verma, u myntri khynnah ka tnad Petroleum bad Natural Gas, Labour bad Employment, u Rameshwar Teli, ia baroh ki myntri ka sorkar Meghalaya kiba la ia don lang bad kiwei ki mytnri na kiwei ki jylla kiba la ia poi lang ha kane ka sngi.
