Shillong, Jymmang 07: Ka Seng lyngba kane ka kyrwoh ka pynrem jur ia ka Sorkar Jylla kaba lah wanrah ia ka Ain ban nym khein beain shuh ia ki kam khalai ha ka Jylla lyngba kata ka Meghalaya Regulation of Gaming Act, 2021 bad kumjuh ruh ka Rules, 2021.
Lyngba kane ka Ain, ka Sorkar Jylla ka lah plie war ia ka lynti ban pynlong ia ka Jylla ka jong ngi kum kata ka Jylla ha kaba ki briew kin tip noh kum ka “Gambling State” ne “Jylla ia khalai”.
Ka Seng ka pynpaw ia ka jingkyrshan ia ka kynhun ki Seng Balang bad kumjuh ruh ia ka kynhun ki niam bapher bapher kum ka KJCLF bad ka SAFF Kiba lah mih shakhmat ban pynpaw ia ka jingpyrshah bad ban dawa ba dei ban pynduh pyndam noh ia katei ka Ain.
Ka Seng ka pynpaw ba ym dei tangba ka khalai lane kita ki casinos ki long pyrshah ia ka niam ka rukom jong ngi hynrei khamtam ka long pyrshah ia ka burom ka ijot longbriew manbriew(morality), kaba kum ka Jylla bad ka jaidbynriew ngi khein kor haduh katta Katta.
Ka HYC ka pynpaw ruh ba kane ka Sorkar imat kam pyrkhat bha ba ka Khalai ka lah ruh ban wanrah sa kiwei ki jingsniew ha ka imlang sahlang, kum ka jingdih buaid naduh ki droks, ki kam awria bad kiwei kiwei ki jingsniew ha kitei ki jaka khalai.
Kum ka seng ka pyrshah ia ka jingkren u Conrad Sangma ban pynpaw ba ka Sorkar kam pat pyntreikam ia katei ka Ain haduh mynta bad ba kin dang iakren bad iathir sani bha ha shuwa ban shim Rai.
Kane ka long kaei kaei ka bym lah ngeit namar Lada ka long kumta, ka Sorkar Jylla ka lahdei ban ia Mir jingmut ha shuwa ban wanrah ia ka Ain hapoh Ing Dorbar Thaw Ain bad ruh kam pat dei ban shna ia ki Rules. Hynrei kumba ka long mynta ka Ain lahdep shna bad kaba sah ka long tang ban jied ia ki Jaka ban buh ua ki Casinos bad ban ioh ia ki kompeni ki.
Ban pyniaid ia ki jingialehkai bapher bapher. Dei tad ba lah mih ka jingpyrshah ba u Conrad Sangma u sa pynpaw ia kitei ki kyntien bad Kiba dei tang ki kyntien ban da rapjot ia ka jingleh bakla jong ki.
Ka Seng ka dawa ruh na ka Sorkar ba Lada ka Sorkar ka kwah ban pynheh ia ka jinglum khajna ka jong ka khnang ba Kan Leh ban Leh ia ki kam pynroi ha ka Jylla, ka dei ban shim da kiwei ki lad ki lynti ym da kaba pynlong ia ka Jylla ka jong ngi kum ka Jaka Khalai.
Ka HYC ka dawa ba dei ban pynduna ka jingleh lut phut ban pynlut ha ki Festival Kiba bapher bapher ki bym phoida ei ei ia ka Jylla, ban nym siew shuh kano kano ka jingsiew ia ki MLA/MDC, Ex MLA/MDC/MP Kiba bat kum ki Chairman, Co Chairman, Vice Chairman bad kiwei kiwei ha ki Boards, Corporation, namar ba kitei baroh ki ioh ia ka tulop bad pension ka jong ki.
Dei ruh ban wanrah ia ka rukom treikam ka bym ailad ia ka bamsap bampong ha ka Jylla(zero tolerance policy on corruption). Dei ban tehlakam ba ka khajna ba ka sorkar ka dei ban ioh kan ym Syrwa kai( leakage of Revenue) bad ruh ban tehlakam ia ki kam benami kiba ailad ia ki bym dei ki Riewlum ban trei ban ktah khlem da siew khajna Sha ka Sorkar.
Kum ka seng ka dawa ba ka Sorkar kadei ban pynduh pyndam ia kane ka Ain bad ka Rules ha kaba iadei bad ka Khalai bad ba Kan thaw da kiwei pat ki lad ki lynti ban ioh lum khajna na bynta ka Jylla. Kane ka long katkum ka kyrwoh kaba la phah da u bah Roy Kupar Synrem General Secretary jong ka seng HYC.
