Shillong, Jymmang 22: Ha ki artylli ki jingkhynra hynnin ka sngi bad ha kaba sdang jong ka taiew ha ka thain shatei lammihngi, ka Guwahati Zonal Unit jong ka Directorate of Revenue Intelligence (DRI) ka la ioh ban kurup ia ki kwai kiba nabar ri kiba la shalan beain kumba 60,000 kilo eiei.
Halor ka jingioh jingtip ba kyrpang, ka DRI ka la pynlong ia ki jingkhynra ha Mizoram bad Assam kaba la ialam sha kine ki jingioh kurup. Ha ka jingsdang ia ki jingtohkit la lap ba ïa ki kwai ba la tyrkhong kiba dei nabar ri la pynpoi tuh sha India na Myanmar lyngba ka thain khappud Myanmar-Mizoram.
Ha kawei na ki jingkhynra la ïarap ïa ka DRI da ki shipai 38Bn jong ka Assam Rifles. Haduh mynta, la kem haduh 5 ngut ha kine ki jingkhynra.
Ka jingwanrah beain ia ki kwai na ka ri ba marjan ka wanrah ia ka jingduhnong kaba khraw ha ka ioh ka kot jong ki nongrep kwai hapoh ka ri bad ka pynthut ia ka jingshngain ha ka ioh ka kot ha ki thain khappud.
