Shillong, Jymmang 22: Ka jingpynlong ia ka jingsngap paidbah na ka bynta ban tih mawshun ka kompeni M/s Shree Cement Company Limited kaba la buh ban long mynta ka sngi ha Lum Syrman la hap ban pyn sangeh noh na ka daw jong ka jingiapyrshah.
U President ka Jaintia National Council, u bah Sambormi Lyngdoh u la ong haba ki paidbah ki iatylli ka sorkar kam lah ban leh eiei bad u la ong ba kane ka khubor kaba shai sha ka sorkar ba wat ialehkai bad ka hok jong u paidbah khamtam ki nongrep.
U la ong ba tang kane ka jingpynsangeh ia kane ka jingsngap paidbah kin nym hun hynrei ngin ia buddien ba kito kiba la shah knieh ia ka hok jong ki ba ki dei ban ioh ia u pud u sam uba thikna. Ha kane kajingiakhih la don lang ruh ka Jaintia Student Union ha kaba kine ki ar tylli ki seng kila iatreilang ban pyrshah ia kane ka jingpyngsngap paidbah.
Ha kane ka sngi, la kynnoh ba ki kynhun kiba kyrshan ia ka M/s Shree Cement kila pakhang lynti da ka trok bad ki briew ki bym lah ban tip ki la wiang ding ia kane ka trok bad ha ka jingbun paidbah ki la pynkynriah ban iaid lynti ha shi lynter la buh da ki maw ha surok bad kane ka la long ka jingwit ba khraw ia kiba leit sha kane ka jingpynsngap paidbah.
Ha ka jaka ba la pynlong ia ka jingpynsngap paidbah,ka la mih ka nia ktien hapdeng kiba kyrshan bad kiba pyrshah la don ka jingia lynthaw ia ki shuki plastik kiba la buh ban shong bad haba la iohi ba ka la mih ka jingiather nia markylliang ki bor ba dei peit kila pynsangeh noh ia kane ka jingsngap paidbah.
