Shillong, Jymmang 12: Ka kong Ampareen Lyngdoh kaba dei ka myntri sorkar kaba peit ia ka tnad k rep ka riang ha ryngkat u bah Ardent Miller Basaiawmoit u ba dei u MLA ka Nongkrem Constituency bad ruh u bah Adelbert Nongrum u MLA ka North Shillong kumjuh u Syiem ka Hima Mylliem u paiem Ainam Manik Syiem.
Kane ka jingleit jurip ia ka iew dielang ia ki jhur ha Iewduh, kane ka jingleit ka long ban sngap ruh ia ka jingpynsngew jong ki nongrep kiba shah ot kilo ha katei ka iew die lang ia ki jhur.
Ha ka jingleit jurip ia ka Iewduh, ka myntri ha ryngkat ki MLA lem bad u Syiem ka Hima Mylliem ki la ioh ban iakren ia ki nongrep, ki nongkhaii bad ia ki nongwan iew, kila pynsngewthuh ruh ba donkam ka jingiatreilang na ka bynta ban wanrah ka jingmyntoi ia baroh hapoh Iewduh.
Haba kren ha kane ka sngi, ka kong Ampareen ka ong ba ka jingwan jurip ia ka Iew ka dei ruh ban buddien ia ka Bill jong ka Khasi Hills Autonomous District Council bad ka hukum jong ka ophis ka Hima Mylliem ban pynduh noh ia ka ktien ‘Ot Kilo’ ia ki mar rep hapoh ka Iewduh bad ha kiwei ki iew ba hap hapoh u pud u sam ka district council.
“Ka la donkam palat ban pynduh iaka ktien ‘Ot Killo’ ia ki mar rep ha ki Iew namar kane ka pynduh nong bha ia ki nongrep ka jylla” Ampareen Lyngdoh la ong na ka liang ka tnat ka rep ka riang, ka la shim khia ia ka jingeh ki nongrep ka jylla khamtam haba iadei kane ka jingshah Ot Kilo ki mar rep ha ki Iew.
Ka kong Ampareen ka la ai khublei ia u bah Ardent ba u la rah ia kane ka mat shah ot Kilo ki mar rep ha ki Iew, hapoh ka ingdorbar thaw aiñ ka jylla, ka la iathuh ruh ba naka liang ka sorkar jylla lyngba ka tnat ka rep ka riang kan sa shim khia halor kane khnang ba ki nongrep bad ki nongkhaii kin nym shah ktah shuh.
