Shillong, Naiwieng 21: U Nongmareh marathon barim jong ka Meghalaya, Bah BinningstarLyngkhoi u la kyntu ia ki samla jong ka India ban iashim bynta shitrhem ha ka jingiakopViksit Bharat shuwa ka National Youth Festival 2025.
Da ka khubor ai mynsiem, u Bah Lyngkhoi u la pynshlur ia ki samla jong ka ri ban shim ia kane ka jingiakop kum ka kabu ban kyntiew, ban ioh jinghikai, bad ban saindur ia ka lawei jong ka ri.
U Myntri Sorkar Pdeng ba dei khmih ia ka Tnad ki Kam ialehkai, Dr MansukhMandaviya, ha kane ka taiew u la pynbna ia ka jingpynlong ia ka ‘Viksit Bharat Young Leaders Dialogue’ ha ka National Youth Festival ha ka 11 bad 12 tarik Kyllalyngkot jong u snem ban wan.
Ha kane ka prokram kaba ar sngi, u Myntri Rangbah duh jong ka ri, Narendra Modi un iakren bad 3000 ngut ki samla ha Bharat Mandapam ha ka nongbah jong ka ri.
“Kum u nongialehkai, nga la shem ba man ka jingiakhunkadei ka kabu ban kiewshaphrang. Ka Viksit Bharat Young Leaders Dialogue ka ai ka rynsan ia phi ban pyni ia ki sap jong phi, ka pynproh ia ka bor pyrkhat, bad pyniasoh bad ki briew kiba stad na kylleng ka ri.
Iashim bynta ha ka jingiakopViksit Bharat – kadei ka kabu ia phi ban tyngshain bad ai mynsiem ia ki pateng ban wan. Ngeithalade ban leh bha!” la ong u Bah Lyngkhoi.
Ka Round 1 jong ka JingiakopViksit Bharat ka kynthup ka jingiakop all-India digital quiz, ban long hapdeng ka 25 tarik Naiwieng 2024 bad 5 tarik Nohprah 2024.
Ki samla hapdeng ka rta 15 bad 19 ki lah ban iashim bynta ha ka quiz ba pynlong ha ka rynsan MeraYuva Bharat (MY Bharat). Kane kan peit ia ka jingnang jingstad jong ki samla bad ka jingsngewthuh jong ki ia ki jingjop ba kyrpang jong ka India.
Ki nongjop jong ka jingiakop quiz kin hap pyndep salai round ha ka dur jong ka jingiakop thoh essay, blog, ka jingpyni ia ka ‘Viskit Bharat Vision’ ha ka jylla bad ka jingiakhun ha ka ri ha kaba yn iashim bynta da ki nongjop na ki jylla bapher bapher ha ka Bharat Mandapam.
Hashuwa kane, u Dr.MansukhMandaviya u la kren shaphang ki jing thmu jong ka ‘Viksit Bharat Young Leaders Dialogue’, bad u la ong, “Ka tamasa ka thmu ban ithuh bad kyntiew ia ki sap jong ki samla, da kaba pynbiang ka rynsan ia ki ban iasam ia ki jingthmu jong ki na ka bynta ka Viksit Bharat.
Ka bynta ba kongsan na ka bynta ki samla kan long ka kabu ban iakren markhmat bad u Myntri Rangbah duh bad ai ia ki jingthmu jong ki na ka bynta ka lawei jong ka India, bad kyntiew ia ka jingdon bynta ki samla ha ki kam sain pyrthei bad ha ka imlang sahlang.”
U Dr Mandaviya u la buh thong ban khring kumba 1 klur ngut ki samla (hapdeng ka rta 15-29 snem) na kylleng ka ri ban iashim bynta ha ka JingiakopViksit Bharat, ka ban long kum ka wat ba nyngkong sha ka prokram ba kongsan ha Bharat Mandapam.
Ka Viksit Bharat Young Leaders Dialogue – National Youth Festival 2025 kan wanrah lang ia ki samla ba shah jied ha ki lai tylli ki bynta. Ka kynhun kaba nyngkong ka kynthup ia ki nongiashim bynta na ka Viksit Bharat Challenge ba dang shupynbna.
Ka kynhun ba ar ka kynthup ia ki samla ba don sap kiba wan na ki district bad state-level youth festival, ha kaba kin iakhun ha ki bynta bapher bapher kum ka jingdro, ki science exhibition, ki jingpyni ia ka deiriti, ki jingiakhun declamation bad kiwei kiwei.
Ka kynhun ba laikan kynthup ia ki nongprat lynti bad ki samla ba pawnam ha ki kam bapher bapher ba kynthup ia ka jingseng kam lajong, ki kam ialehkai, ka rep ka riang, ka teknoloji bad kiwei kiwei.
