Shillong, Nailur 29: Ha ka jingia shim bynta halor ka phang kaba la pynbeit da ka Meghalaya College Teachers Association (
MCTA) ha ka jingiapyni nia ka jingpyrkhat ki stad kot ” Academic discourse halor ka Article 370, hadien ba la sngap ia ki nongkren kaba la long ha ka Sngi Saitjain ha MIITRS Hall, Brookdene, Cleve Colony, kaba la kynthup ia ki nongkren u Mr Nalin Kholi nongai ktien ka BJP,u samla Bansharailang Pyngrope, President NSUI na ka party Congress, u Bah BM Lanong, Adviser, UDP.
Kiwei kiba la ia shim bynta ki long ki Professors na ka skul bah jong ka NEHU bad Synod College kiba la sei ia la ki Jong ki Nia halor ka jingpyntlot bor ia ka Article 370, bad la ioh ruh ia ka jingpyrkhat na u Mr Khalid Khan, u Senior Advocate uba la ong ba ka iing bishar kaba ha Khlieh Duh ka Supreme Court na dei naka Constitutional Bench kaba san ngut kin sa bishar bniah ia katei ka phang Ain 370 kaba kyllian bad kaba jwat bha.
Halor kane ka phang bad ka SC ka lah ban shim por Lai saw snem ban ai ia ka rai kaba khatduh halor kane ka Ain 370 namar ym tang ba la pyntlot bor ia ka Article 370 la phiah ruh ar liang ia ka jylla da kaba thaw pat ar tylli ki Union Territory bad ha kaba la pynhiar kyrdan ia ka jylla Jammu bad Kashmir Sha ka Union Territory kine ki bynta jong ka ain u la ong ki long ki phang kiban long ka jingiatai kaba jur hapoh ka iing bishar kaba ha khliehduh.
Ha ka por ka jingiashim bynta kum u nongshah khot sngewbha bad u Bah John F Kharshiing, Adviser bad Spokesperson, Federation of Khasi States, u la pynsngew ba ha kawei ka liang ka Sorkar BJP ka la trei sted ban tuklar ia ka 370 bad ka Instrument of Accession jong ka jylla Jammu bad Kashmir ha kaba baroh kawei ka Ri India bad ka jylla Meghalaya ki ia tai halor katei ka sien jam ka Sorkar India.
Kaei kaban mih ym tip namar ka don hapdeng ka jingbishar, bad ha kawei pat ka liang baroh kawei ka Ri India kim bna lane kim pat iakren kim poi pyrkhat ba ka don sa kawei ka Instrument of Accession bad Annexed Agreement kaba iadei bad ka hok ki Hima Khasi States bad kaba jan ia syriem bad ka hok ki nong kashmir.
Ha ka jingkren u Adviser bad Spokesperson, Federation of Khasi States, u la pynpaw ia ka jingkyrshan ia ka jingkren u Dr H Shrikant, HOD, Pol Sc, NEHU, uwei na ki nongshah khot kyrpang u ba la ong ba ki nongmihkhmat bad ka dorbar thaw ain ka dei ban ioh ka jingmynjur ki paidbah khnang ba kata ka ain kan long kaba trei Kam.
U Bah John F Kharshiing u la kdew ba ki kyntien lamphrang ka Constitution Ri India ka sdang da kine ki kyntien “We the people..” lane ” Mangi ki paidbah…” hynrei kitei ki kyntien ki long kiba ialam bakla namar ba ki dulir jingiateh bad ki jingkular ha ka Instrument of Accession and Annexed Agreement kaba la soi bad mynjur da u C Rajagopalachari, Governor General ka India ha ka 17 tarik Aug 1948 bad ka Federation of Khasi States, ym pat lah ban pyndep haduh kine ki sngi.
U la kdew hakhmat katei ka rynsan ba kaba lyngoh ka long ba ka Sorkar India Kam pat pyni ka juh ka jingkyrkieh kumba kyrkieh ia ka Kashmir ban tuklar pyndep ia ka hok ki jingiateh ki jingkular IOA & AA 17 Aug 1948 bad ka Federation of Khasi States kaba dei ka synjuk jong ki arphewsan ki Khasi States, ia kaba dang sah teng mynta 70 snem, kane ka juh ka Kam ka sahkut ha kaba iadei bad ki riewlum NAGA ka thain lam mihngi.
U Bah John F Kharshiing u la ong ba ka jingdkoh hapoh ka Constitution Ri India bad ki Khasi States lah ban iohi ba ka paw tynkrien ki kyntien ” Khasi States” haduh kine ki sngi ha kaba la bsuh jubor ia ki Hima Khasi States hapoh ka jylla Assam hapoh ka First Schedule bad kane ka long be-ain bad ka dei ka jingdkoh namar ki Hima Khasi States kim shym pdiang ban soi ia ka Instrument of Merger.
kaba kham Lyngoh ka long ba ka Sorkar India ki la leh donbor ia kane ka kam khlem da iaid lyngba ki kyndon Article 290(a) bad 290(b) jong ka Government of India Act 1935 kumba la leh ia baroh ki 540 tam ki Hima Princely States haba thaw lynti ban pyniasoh India.
Ha ka juh ka por u la ai khublei ia ka kynhun Meghalaya College Teachers Association (MCTA) kiba la pynlong ia kane ka seminar halor ka Article 370 bad u la kyrpad ia katei ka kynhun MTCA ban pynlong ia ka juh ka rynsan ia tai ia kren halor ki kyndon rung iasoh India ka ki 25 Hima Khasi States lyngba ki dulir Instrument of Accession bad Annexed Agreement ba la soi ruh Kum ka synjuk Federation of Khasi States.
Ha katei ka jingjiakren la ioh ki kyntien plie na i Dr BH Buam, President, MCTA, bad ha ka kylla kaba nyngkong la ioh ka jingkren na u Dr CV Ananda Bose, IAS(Retd), bad na u kongsan u Dr H. Lamin, Pro-VC NEHU.
