Shillong, Nailar 21: Mynta ka sngi u Dr. Lajja Ram Bishnoi, IPS, Director General ki Police jong ka jylla Meghalaya u la plie ia ka jingiakop kilan met jong ki shipai BSF kaba la ai kyrteng ka “Inter-Frontier Judo Cluster Competition 2023” kaba san sngi ha NEHU.
Ha kane ka jingiakop ki don 11 tylli ki kynhun jong ki shnat jong ka BSF kila wan ban ia shim bynta ha kane ka jingiakop kilan met, kine ki nongiashim bynta kila wan da ka jingangnud ban ia shim bynta ha ka jingialehkai ban pynia ki sap ki phong kaba ki don.
Ha kane ka sngi sdang jong ka jingialehkai la don lang u Pradip Kumar IPS, Inspector General jong ki BSF Meghalaya Frontier, ha ka jingiadon lang kiwei ki heh na ki tnad shipai bapher bapher. Ia ka jingialehkai la sdang da ka jingshim smai.
Ha kane ka jingsdang ialehkai kala don ka jingiaid kilan met da ki nongiashim bynta bad ha ka jingkren u kongsan ha kane ka sngi ki la pynshlur ia ki nongiashim bynta ba kin pyni ia ka sap ka phong kaba ki don bad ia ka mynsiem ialehkai.
Ka jinglong jingman jong ki BSF ka long ban hikai bad ban kyntiew kumno ban im ka jingim kaba shait ba khlain bad ban wanrah ia ka jingiatylli kawei bad ka jingiaid beit iaid ryntih ka dei ka bynta jong ka jingim ki shipai BSF.
