Shillong, Iaiong 16: Mynta ka sngi la pynkyntang bishop ia u phadar Wilberth Marwein ban peit ia ka jylla niam Nongstoin da u Archbishop Leopoldo Girelli ba dei u pronuncio ba mih khmat ia ka Vatican sha India.
Ia ka jingleh niam la lah khmat da u Archbishop jong ka jylla niam Shillong u Rev. Victor Lyngdoh ha ka jingiadonlang baroh ki Bishop kane ka thain shatei lam mih ngi ka Ri India kiba la wan ban ia don bynta lang ha kane ka jinglehniam pynkyntang Bishop ha Nongstoin mynta ka sngi.
Ha kane ka sngi ki riew ngeit jong ka Balang Katholik na kylleng ka Ri Khasi Jaintia kila poi sha Nongstoin ban sakhi lang ia kane ka sngi kaba sah kynmaw kaba khraw ban ioh ia u Bishop ha dien bun snem naduh bala pynkynriah noh ia u Bishop Victor Lyngdoh kum u Archbishop jong ka jylla niam bah Shillong.
Ha kane ka sngi u mytnri rangbah ka jylla u Conrad K Sangma u la donlang ban ia sakhi ia kane ka sngi kaba khraw, u MP jong ka Shillong u bah Vincent H Pala bad kiwei ki riew rangbah na kylleng ka Ri Khasi Jantia la ia don lang ha kane ka sngi.
Ha kane ka sngi bun na ki riew ngeit jong ka Balang Katholik kim shym la ioh ban ia shim bynta ha ka jinglehniam na ka daw jong ka jingdheng kali bad bun ki la hap ban iaid da ka kjat bun kilo metter ban poi sha ka jinglehniam.
