Shillong, Nailur 01: Mynta ka sngi ka 01/Nailur/2026 u myntri rangbah ka jylla u Cornad K Sangma u la ia shim bynta ha ka jingduwai kaba la pynlong ha lum jingtep ka balang Katholik ha, Tura ban kynmaw burom ia ka sngi kha kaba 79th snem jong u Purno K Sangma bam kwai ha dwar u Blei, u ba dei u Lamphang ba rim ka Lok Sabha nad u myntri rangbah ka jylla Meghalaya.
Ha ka jingkren u myntri rangbah ka jylla u Conrad K Sangma ban kynmaw burom ia ka sngi kha u kpa jong u la ong ba u Purno A Sangma u dei shuh tang u nongialam bad u la dei u nongprat lynti, namar kaei kaba u hikai ka dang btin lynti ia ki haduh mynta bad kata ka dei ka jingkut jingmut ban long kiba sngewrit, ban long kiba ryntih bad ban shakri ia ki paidbah kiba duk bad kiba rangli.
U la pynkynmaw ba u Purno u don ka jingioh jngai na ka bynta ki khun samla bad u ong ba ki dei ki lawei jong ka ri bad ka jaidbynriew, ka jingkhlain jong ka ri bad ka thain shatei lammih ngi ka shong ha ki samla.
Kum u myntri rangbah ka jylla u ioh ia kawei ka thong kata ka long ban pynkup bor ia ki khun samla, lyngba ka pule puthi, ka kam ka jam, ka jinglong nongialam bad u kyntu ia ki samla ba kin long kiba shlur bad ba kin tip ia la ka thymmei bad ki dei ban long ki nongialam ha baroh ki liang.
U Purno A Sangma u long ka dak jong ka jingialong kawei hapdeng ka jingdon kiba bun jaid ki jaidbynriew, ban kyrshan ia lade, ban sngew sarong kum u riewlum bad ban wanrah ia ka jingialong kawei ha ka ri bad kane kan dang iai ai mynsiem ia ki pateng ki ban dang wan.
Ha dien bala dep ban pynlong ia ka jingduwai la buh syntiew ban kynmaw burom ia kane ka sngi ha P.A. Sangma Sports Complex, Dakopgre, Tura, ha kane ka sngi la don lang ki MLA , ka Mehtab Chandee A. Sangma, u Sanjay A. Sangma bad Ian Botham K. Sangma, ia ka jingduwai la ialam da u Bishop Synrop ka Tura Rev. Jose Chirackal.
