Shillong, Naitung 01: Ka National Statistics Office (Field Operations Division), Regional Office Shillong, kaba hap hapoh ka Tnad Statistics and Programme Implementation (MoSPI), ka la rakhe ia ka National Statistic Day kaba 20 ha Shillong College Auditorium ha ka sngi Nyngkong ban kynmaw burom ia ka lyngkhuh sngi kha jong u Prof. Prasanta Chandra Mahalanobis, ia uba la tip kum u Kpa ka kam khein Statistic jong ka India.
Ka prokram, kaba la pynlong ha ka phang pdeng “Unlocking the Potential of Administrative Data,” ka ban jur ia ka jingkiew ka jingdonkam jong ki jingtip ba iadei bad ka jingpyniaid ha kaba pynkhlain ia ka jingthaw polisi, ka jingsynshar bad ka jingai jingshakri ia ki paidbah kaba pynshong nongrim ha ki sakhi.
Ha ka jingai jingkren jong ka, ka Kong E.N. U Dkhar, Vice Principal bad Head of the Department of Physics jong ka Shillong College ka la ban jur ia ka jingkongsan jong ka Statistic Day bad ki jingnoh synñiang kiba iaineh jong u Prof. P.C. Mahalanobis. Ka la pynshlur ia ki samla pule ban iashim bynta shitrhem ha ki jingiaphylliew jingmut bad ban sngewthuh ia ka bynta jong ka statistics ha kaba weng ia ki jingeh kiba shisha ha ka pyrthei.
Haba ai jingkren ha kane ka sngi, u Monojit Das, Deputy Director General, NSO (FOD), Shillong, u la ban jur ba ki jingtip ba la pynmih lyngba ka jingsynshar ba man ka sngi ki la kylla long u budlum jong ka jingthaw ia ki polisi kiba pynshong nongrim ha ki sakhi.
U la ban jur ia ka jingdonkam ban pyniasoh lang ia ki dataset ha kylleng ki tnad katba dang pynthikna ia ki jingiada kiba khlain katkum ka ain, ki jingbahkhlieh bad ka jingiada ia ka jingtip shaphang ki briew.
U Kongsan, Prof. Bishal Gurung, Head of the Department of Statistics jong ka North Eastern Hill University (NEHU) u la kren halor ka jingdonkam jong ki jingtip kiba iadei bad ka synshar khadar ha ka jingwad bniah, ka jingsynshar bad ka jingpynroi.
U la ban jur ia ka jingiahap kaba nang kiew jong ka jingkhein statistic ha ka science bad ka polisi paidbah bad u la kyrshan ban pynrung ia ka Statistics kum ka sobjek ba kyrpang ha ki skul ban pynkhlain ia ka jingtip shaphang ka jingkhein statistic.
Ia ka jingpyni ia ki sienjam ban pyniadei ia ki jingtip ba iadei bad ka synshar khadar ha Meghalaya la ai da u Bah Jerrymaya Lyngdoh, Statistical Officer, tnad Economics and Statistics jong ka Sorkar Meghalaya, uba la ban jur ia ki sienjam jong ka Jylla ban pynbeit ia ki jingtip ba iadei bad ka sorkar katkum ki kyndon jong ka MoSPI.
U O. Patton, Deputy Director, NSO (FOD), Shillong, u la ai jingkren ruh halor ka National Sample Survey bad ka jingnoh synniang jong ka sha ka rukom khein statistic jong ka ri, bad u la kren ruh shaphang ki lad kamai ha ka liang ka jingkhein statistic.
La pynlong ruh ia ka jingiakop extempore speech halor ka jingdonkam jong ki data bad ka statistics. Ka Hundaka Leoza Hinge jong ka St. Anthony’s College ka la jop ia ka jingiakop, katba ka Shirinmi Athary jong ka ka St. Anthony’s College bad ka Wanrisuk K.R. Lyngdoh jong ka Shillong College ki la wan ha ka kyrdan ba nyngkong bad ba ar.
Ha kane ka prokram la wan ïashim bynta da ki ophisar na ka Tnad Economics and Statistics jong ka Sorkar Meghalaya, ki nonghikai bad ki samla pule na Shillong College, St. Anthony’s College bad kiwei kiwei ki jaka pule.
