Shillong, Jylliew 27: Ka Petroleum Dealers Association, Meghalaya (PDAM) mynta ka sngi ka 26 tarik u Jylliew 2024 ka la mih shakhmat ban pynshai sha ki paidbah ba ka sorkar kmie na duh u snem 2022 lyngba ka Petroleum Ministry kala ailad ia ka ban khleh lang bad ka 10% ethanol ha petrol ha poh ka ri India.
Mynta ka sorkar kala sdang ban khleh haduh 20% ka ethanol ha ka petrol. Na ka liang u President ka PDAM u la kyntu ia ki paidbah ba kin long kiba phikir bha namar baka don ka jingkhleh ia ka Ethanol ha ka petrol. Namar ba ka Ethanol ka dei kaba kjit ia ka haw haw bad kloi ban shim ia ka um kumta ka lah ban ktah kylla ia ki kali.
Haba iakren bad ki nongpathai khubor, u President ka PDAM Bah Kenedy C Khyriem ula ong ba ki Dealers Association ha ka ri baroh kawei, kila pyrshah jur ia kane ka jingthmu jong ka Sorkar namar wat lada don tang khyndiat ka um ha ki tanki kali ne hapoh jong ka tanking jong ngi kiba don shapoh khyndew, kane kan pynmih ia ka jingeh. Hynrei ka sorkar kala pynmih ia ka Petrol bad die ia kane ka petrol ba khlehlang bad ka Ethanol.
Ka jingpynsngewthuh paidbah kala iaid ha baroh kawei ka ri shaphang ka jingkhleh lang ia ka Ethanol ha ka Petrol khnang ba ki paidbah kin tip ia ki jingeh ki ban mih bad ba kin nang ban sumar ia ki tanki ha ki kali jong ki, kum ka nuksa ba kin ym pynieng kulmar ia ki kali, scooty, motor bike ha ki jaka bym don jingker ne jingkah.
Khamtam ha ka por lyiur ka long kaba kongsan ia ki nongthied ba kin tap bha ia ki kali bad ki thuk thuk khamtam eh ia ki thuk thuk bad ban pynthikna ban tap bha ia ki jingsop jongka tanki.
U Bah Kenedy ula ong ruh hashwa ban sdang ia ka jingkhleh lang ia ka Ethanol bad ka Petrol, ki trai jongki Petrol Pump kila pynkhuid ia ki tanki kiba don shapoh khyndew ban pynthikna ba ym dei ban don um.
Nalor kane, ngi khmih man la ka sngi ia ki tanki ban ym don um. Nalor katei, ka Meghalaya ka dei kaba mad ia ka jingjur slap bha kumta ka don ka jingma ba ka um ka lah ban rung ha ki tanki khamtam eh ha ki tanki jongki thuk thuk.
