Shillong, Jylliew 9: Ka Sonam Raghuvanshi kaba la wan ban pyndem noh ia lade ha ki pulit ka Nandganj Police Station ha Ghazipur jong ka jylla Uttar Pradesh, hadien ka jingpyniap ia la u jong u lok u Raja Raghuvanshi la khmih lynti ba kam poi mynta ka miet ha Shillong.
Kum ban shu kdew ba ki pulit ka jylla Meghalaya kila kem ia saw ngut ki shynrang bad kumjuh ruh ia ka Sonam da ka jingiarap ki pulit ka Madhya Pradesh bad kumjuh ruh na ka jylla Uttar Pradesh namar ka jingdonkti ha kane ka jingpyniap ia u Raja.
Hadien ba ka Sonam kala leit ban pyndem ia lade ha ki pulit, ki pulit ka Meghalaya kila leit sha katei ka jylla ban ioh wanrah ia ka shapoh ka jylla ban tohkit bniah halor ka jingshah pyniap u kurim jong ka.
Na ka jylla Uttar Pradesh la ialam ia ka Sonam sha ka jylla Bihar ban lem ia ki jingdonkam bad na Panta Air port yn wan ialam sha ka da lieng suih sha Guwahati ban ialam sha Shillong bad kumjuh ruh ia kito ki saw ngut ki briew kiba ia donkti lang ha kane ka kam.
Katkum ka tyllong khubor ba iajan bha bad ki pulit la ong ba ka lieng ba kit ia ka Sonam kan mih ha ka por 8 baje mynta ka miet 9 tarik u Jylliew na Patna Air Port bad ka khmih lynti ba kan wan poi ha Shillong ha ki por 11 ne 12 baje mynmiet.
