Shillong, Nailur 29: Mynta ka sngi 29/Nailur/2026 ka kur Paliar kala pyntip ba u bah Phaiborlin Paliar u dang dei u Lyngdoh ba shipor jong ka Hima Syiem Nobosohphoh ia kaba u la shah thung ha u snem 2023 ia kaba la thung ha ka por u syiem Kawangbor Syiemiong.
U Lyngdoh ba shipor u bah Phaiborlin Paliar ha ka jingiadonlang ki rangbah kur haba kren ha ki lat pathai khubor mynta ka sngi ha Shillong Press Club u la ong ba u dang dei u Lyngdoh ba shipor ka Kur Paliar katkum ka sanad kaba u la ioh na u syiem ka Hima bad ka kur hi ka ithuh ia u kumta ym don shuh da u wei pat u Lyngdoh ba shipor na ka kur Paliar.
U la iathuh ba hadien bala shah pynhiar khet u syiem ha Hima u Pa’iem Kawangbor u syiem ba shipor u la weng ia u hynrei u la leit ban mudui sha High Court Meghalaya ha kaba ka iing bishar kala pynskhem ia u ha ka kam kum u Lyngdoh ba shipor ka Kur Paliar ha kaba u dang neh ha kane ka kam haduh mynta.
Haba iadei bad ka kam khyndew jong ka Kur u la pyni ia ka dulir ba u syiem ka Hima Langrin u Borsing Syiem u la ai ia kane ka khyndew sha ka Kur Paliar ha ka 5/Kyllalyngkot /1878 da u Borsing Syiem ka Langrin State ka jingkam trai jong kiwei ka long kaba bakla namar ia ka dulir ka don bad ka jait Paliar.
