New Delhi,Nailur 29: ka tnad kam pohiing ka sorkar pdeng ha ka jingiatrei lang bad ka kynhun pulit ba kyrpang jong ka Delhi bad ki kynhun syntiat jong ka sorkar pdeng kila kem ia ar ngut ki ophisar kiba la pyrshang ban iarap ban pynioh ia ka laisen Foreign Contribution Regulation Act.
Ki ophisar kiba la shah kem ha ka 28/Nailur/2026, u wei u trei kum u Senior Accountant bad u wei pat kum u Accountant ha kaba kine ki briew kila ia kynduh ia ki katto katne ki kynhun ba ki lah ban pynioh ia ka laisen ne ban pynthymmai ia ka laisen haba iadei bad ka FCRA.
U wei na kine ki ophisar ba la shah kem u trei ha ka tnad kam pohiing hi tangba u don ha ka shnat ba dei peit ia ki briew kiba wan nabar ri katba u wei pat u trei hapoh ka Pay and Account Office hynrei mynshuwa une ruh u don hapoh ka tnad kam pohiing ba dei peit ia ki briew ba wan nabar ri.
Ha ka jingtohkit ka don ka jingkynnoh ba kine ki ar ngut ki la don ka jingiakynduh jong ki bad ki katto katne ki kynhun ban iarap ban pynioh ia ka register FCRA ne ban pynthymmai ia ka register FCRA bad ka don ka jingiakular ban ai eiei ynda la ioh, na ka liang ka tnad kam pohiing ka dang bteng ban tohkit ia ki.
Ka tnad kam pohiing ka sorkar pdeng kan nym ailad da lei lei haba iadei bad ka bam sap ka sorkar pdeng kan sa leh ia kaba donkam katkum ki kyndon ain bad ha kajuh ka por yn pynshitom ruh katkum ki kyndon treikam jong ka tnad sorkar, baroh ki aplikoshon ba iadei bad ka FCRA la leh online bad lada don kiba pyrshang da kumne da kumtai kin shah pynshitom katkum ka ain.
