Shillong, Nailur 29: Ka National Institute of Fashion Technology (NIFT) ka la ïoh ïa ka jingjop kaba khraw ha ka WorldSkills Competition, Shanghai 2026 kaba 48, ha kaba ki samla pule bad ki riew shemphang jong ka NIFT ki la mihkhmat ïa ka India ha ki bynta ba kongsan jong ka riam ka beit bad ki sap saindur thymmai, kynthup ïa ka Fashion Technology, Digital Interactive Media Design, Retail Sales and Visual Merchandising
Ka WorldSkills Shanghai 2026, kaba la long ha Shanghai, China, naduh ka 23 haduh ka 26 Nailur 2026, ka la wanrah lang ia palat 1,400 ngut ki samla kiba ïakhun na kylleng ki 68 tylli ki ri bad ki thaiñ ha ki 64 tylli ki sap treikam. Ka India ka la ïashim bynta ryngkat bad ka kynhun kaba heh tam jong ka kaba don 70 ngut ki nongïakhun ha kylleng ki 63 tylli ki sap, da kaba ïoh ïa ka kyrdan kaba 10 da ki 6 tylli ki takma rupa bad 20 tylli ki Medal for Excellence.
Ha kane ka jingïalang, ka NIFT ka la mihkhmat ha ki saw tylli ki bynta jong ka jingtbit—Ka Fashion Technology, Visual Merchandising, Retail Sales bad Digital Interactive Media Design. Ka jingïashim bynta ka pyni ïa ka bynta kaba nang kiew jong ka jingpule ia ka riam ka beit ha ki bynta jong ka jingsaindur, ka kam digital bad ki bynta ba iadei bad ki sap ha ka kam jingdie. Ka jingïashim bynta jong ka NIFT ka la noh synñiang shibun sha kane ka jingjop, ha kaba ki nongïashim bynta jong ka ki la ïoh 2 tylli ki takma rupa bad ka Medal for Excellence ha ki lai tylli ki thup jong ka jingtbit.
Ka Fashion Technology ka la long ka bynta kaba la slem bha jong ka jingïashim bynta jong ka NIFT ha WorldSkills, ha kaba ka Institute ka la ïashim bynta ha kane ka skill naduh u snem 2011. Ha Shanghai 2026, ka Vidhi Niravkumar Suthar, ka samla ba la pyndep ïa ka Fashion Design na ka NIFT Gandhinagar, ka la mihkhmat ia ka India ha ka Fashion Technology bad ka iohpdiang ia ka Medal for Excellence.
Ka Vidhi ka la iaid lyngba ia ka prokram ai jinghikai kaba saw bnai ha NIFT New Delhi hapoh ka jingialam jong ka Prof. (Dr.) Monika Gupta, ka riewshemphang na India, bad ka kynhun ai jinghikai jong ka NIFT. Ka Prof. Gupta, kaba don ka jingshemphang ha ka Fashion Design bad WorldSkills, ka la ai ka jingpynkhreh kaba jur, ka jingai jinghikai bad ka jingialam lynti ha baroh ka por jong ka jingai jinghikai. Ka prokram ka la pynleit jingmut ha kaba pynkhlain ia ka jingtbit ha ka kam teknikal, ka jinglong kaba thikna, ka jingbud ryntih ia ki rukom trei jong ka pyrthei bad ka jinglah ban iakhun hapoh ki jinglong jingman jong ka jingiakop WorldSkills.
Ha ka Digital Interactive Media Design, u Kovid Ajay Gangrade na ka NIFT Mumbai u la ioh ia ka takma rupa, katba ka Saniya Joshi na ka NIFT Panchkula ka la ioh ia ka takma rupa ha ka Retail Sales. Ki jingjop jong ki kilong kiba kongsan bha namar ka Retail Sales bad ka Digital Interactive Media Design kidei napdeng ki jait jingtbit ba thymmai bad kiba dang mih kiba la ban jur ha ka WorldSkills Shanghai 2026, kaba pyni ïa ka jingkylla jong ka jinglong jong ki kam kaba iadei bad ka riam ka beit bad ki kam saindur bad ka jingïasoh kaba nangkiew jong ka teknoloji, ki rynsan digital bad ka jingshem jong ki nongthied bad kane ka bynta.
Ka jingïashim bynta jong ka NIFT ka la don ruh ha ka kam Visual Merchandising, ha kaba ka Anuja Ajay Vare na ka NIFT Bengaluru ka la mihkhmat ïa ka India ha kane ka bynta.
Na ka bynta ka NIFT, ka jingiaid lynti jong ka WorldSkills ka pyni kham palat ban ia ka jingiashim bynta ha ka jingiakop jong ka pyrthei. Ka ai ia ki samla pule ia ka jingshai shaphang ki jinglong jingman jong ka kam ha ka pyrthei, ki teknoloji kiba dang mih, ki rukom treikam jong ka pyrthei bad ki jingkhmih lynti ha kane ka kam. Ka jingshem ka plie lad ruh ia ka NIFT ban iai pynkhlain ia ki rukom ai jinghikai jong ka bad ban pyniasoh ia ki rukom treikam ba bha tam ha ka pyrthei ha ka rukom hikai bad ka jingkyntiew ia ki jingtbit.
Ka jingjop jong ki nongiashim bynta na ka NIFT ha ka WorldSkills Shanghai 2026 ka pyni ia ka jingshimkhia ba iai bteng jong kane ka jaka pule ban kyntiew ia ki riew shemphang kiba la pynkhreh ban iashim bynta ha ki kyrdan ba ha khlieh duh jong ka pyrthei, katba ka wanrah lang ia ka kam kaba iadei bad ka riam ka beit, ka teknoloji, ka jingstad, ka jingdie bad ki jingtbit ha ki kam digital.
Ka NIFT ka la kitbok kitrwiang ia ki samla pule, ki riewshemphang, ki nongai jinghikai, ki ophisar, ka tnat Kam Jain bad baroh kiba iadon bynta ha ka jingpynkhreh bad ka jingiashim bynta ha ka WorldSkills Shanghai 2026.
