Shillong, Jylliew 09: Ka Meghalaya Pradesh Congress Committee lyngba u bah Manual Badwar ka phah ka jingsngewlem sha ka ing ka sem u Raja Raghuvanshi u ba la shah pyniap ha ka kurim jong u ka Sonam Raghuvanshi ha ka jingwan shangkai pyrthei ha Meghalaya.
U bah Manual Badwar u la ai ruh ka jingkhublei kaba kyrpang eh ia ka police force, watla hapdeng ka jingshah kynthoh ka ba jur ia ka shnong ka thaw bad ka jylla Meghalaya hi ruh baroh kawei.
U la ong ba ka jinglah ban pynpaw shabar ia kane ka jingjia lehse ka dei namar ka jingtreishitom bad ka jingaitilud jong ki police, ba lehse kine ki ba leh ia kane ka kam ki syier noh ia kito kiba donkti ban leh ia kane ka kam.
U la ong ba lyngba ka jinglah ka police ban trei shitom ban lap ia ka jingshisha, ki jingshah kynnoh sniew ia ka jylla Meghalaya ka la sdang ban khuid noh.U la kyntu ruh ia kito kiba la kynthoh sniew ia ka jylla Meghalaya khlem da ioh ki sakhi sabut ki dei ban pan map bad ia kine baroh ka jingkhublei hi ka leit sha ka tnad police.
Ha kawei pat ka khubor, ka National People Youth Front of Meghalaya lyngba u National President u bah Nicky Nongkhlaw u la phah ka khubor sngewlem sha ki ba ha iing hasem u Raja Raghuvanshi halor ka jing shah pyniap u Raja ha Sohra ha jan ka riat Arliang Weisawdong
U bah Nicky Nongkhlaw National President NPYF u la pynpaw ia ka jingsngewdiaw ba ki don ki jing kynthoh sniew ia ka jylla Meghalaya u la ong ba kito kiba kloi ban kynthoh khlem pat tip ia ka sdang ka kut, mynta ba ka la paw ba ka kurim u Raja kaba pyniap ia u, ki dei ban kloi ruh ban mih shakhmat ban pan map. Kane ka jingkynnoh ka la ktah jur ruh ia ka thain Sohra, ula ong.