Shillong Risaw 27: U Myntri Rangbah ka jylla u Conrad K. Sangma mynta ka sngi 27/Risaw/2026 u la plie paidbah ia ka Hall ha shnong Laitlyngkot ba la ai nam ha ka kyrteng u bah Brington Buhai Lyngdoh myntri rangbah barim ka jylla bam kwai ha dwar u blei.
Ia kane ka hall la ai kyrteng ka ‘B.B. Lyngdoh Memorial Hall Elaka Laitlyngkot’ haba kren ha kane ka jingialang, Myntri rangbah ka jylla u la pynpaw ka jingkmen ban don ha kane ka sngi ban plie ia ka hall ban pynsah nam ia u ne u riewkhraw.
U Myntri rangbah u la ong ba u bah B.B Lyngdoh u dei u nongialam baneh skhem ha ka jingmut jingpyrkhat, wat la hapdeng kano kano jingeh um kynran dien bad ha man ki sienjam naduh ba u dang leit skul u iakhun tyngeh bad um shym la ailad ba ki jingeh kin khanglad ia u.
Ym tang ha ka por ba u dang leit skul hynrei wat ha ka jylli sain pyrthei ruh u iakhun tyngeh bad u la lah ban kiew shaphrang bad kane ka dei ka dak kaba shisha jong ka jinglong nongialam.
U la ong ba u bah B.B. Lyngdoh bad u Purno A. Sangma ki dei paralok bad ki ju ia burom mar kylliang. Kine baroh arngut ruh ki dei kiba la dep ia ka Law, kiba khlain ka jingmut jingpyrkhat khlem randien bad ki dei kiba la noh synniang shibun ha kano kano ka kam ba ki don.
Halor ka jingkren ka kong Syrpailin ka khun jong u bah B.B. Lyngdoh kala iathuh ia ka jingkular u bah D.D. Lapang ban jer kyrteng ia ka Umroi Airport sha ka B.B.Lyngdoh Airport ia kane u myntri rangbah u la ong ia mynta ka kamram kaba ha khmat eh ka long ban pyndep ia ka jingtrei ynda la dep ia ka jingtrei kin sa ia peit.
Ha kane ka sngi u Myntri Rangbah u la noh synniang T.10/- lak tyngka sha ka Elaka Laitlyngkot bad u la ai jingmut ban thaw da ka Foundation ban pynsah nam ia une u riewkhraw, khnang ba ki pateng ban wan kin tip sha phang jong u.
Kiwei kiba la kren ha kane ka sngi ki long ka kong Syrpailin Khonglah, khun u bah B.B. Lyngdoh, bah u bah Gavin Mylliemngap MLA, u bah Titos Chyne MDC nongialam ka liang pyrshah ha KHADC, kine baroh kila kren ia ka jingnoh syniang u tei u rangbah ha ka jylla.
