Shillong, Risaw 27: Ka National People’s Party jong ka Umroi Block ka la pynlong ïa ka jingïalang paidbah ha Madan kynjat bol jong ka Shnong Umroi ha Ri Bhoi District ban pan ka jingkyrshan na ki paidbah na ka bynta u kyrtong jong ka Party u Dr. DRL Nonglait u ban ïakhun ia ka elekshon shiteng samoi sha ka Shillong Parliamentary Constituency.
Ha kane ka jingïalang la ïadon lang u Myntri ka tnat ialehkai ka jylla u bah Wailadmiki Shylla, u MLA ka Mawhati Constituency u bah Charles Marngar, u MLA ka Umsning konstitwensi u Dr. Celestine Lyngdoh, u MLA ka thain u bah Damanbait Lamare,ka MDC Nongpoh konstitwensi ka Kong Rona Khymdeit, ryngkat ki nongïalam, ki nongkitkam bad ki nongkyrshan jong ka NPP na Umroi konstitwensi bad kiwei ki nongïalam ba rangbah jong ka party.
Haba kren ha ka jingïalang, ki nongïalam ka NPP kila kyntu ïa ki paidbah jong ka Umroi konstitwensi ban ai ka jingkyrshan kaba pura ïa u Dr. DRL Nonglait ha kane ka elekshon shiteng samoi. Bad Ki nongïalam kila pynpaw ba u Dr. Nonglait u don ïa ka jingnang jingstad kaba kham halor, ka jingtip bad ka jingshemphang ha ka kam, khamtam ha ka por ba u dang trei ha ka kyrdan baha khlieh jong ka North Eastern Hill University (NEHU).
Bad shuh shuh ki nongïalam ka NPP kila kyntu ruh ïa ki paidbah nongthep vote ban pyndonkam ïa kane ka kabu ban jied ïa u nongmihkhmat u ba biang ba ka party kala shaniah skhem ha u bad ba un lah ban noh synñiang sha ka roi ka par bad ha ka bha ka miat jong ka Jylla baroh kawei.
