Shillong, Risaw 27: Ka National Highway Infrastructure Development Corporation Limited kala ujor sha u Arbitrator namar ia ka surok kaba 2.5 km kaba hap ha kane ka surok ba dang shna mynta na lad Williamnagar sha Darugiri ki ar tylli ki shnong kila dawa bai khyndew T.50/- haduh T.60/- klur tyngka.
Ki thymmei khubor kiba u SP News Agency u la ioh ba kane ka surok ban shna pynheh na lad Williamnagar sha Darugiri ka don 36 Km ha kaba ia ka bai khyndew la dep siew T.71 klur/-tyngka hynrei ka don ka bynta kaba tang 2.5 Km kaba hap ha ar tylli ki shnong kaba kila pan bai khyndew shaba palat pud.
Halor kane ka NHIDCL kala thoh sha ki bor jong ka District Administration ka East Garo Hills ban ia pynbeit hynrei ym shym la lah ban leh kumta ka NHIDCL kam don lynti da kumwei pat kala ujor sha u Arbitrator ban bishar ia kane bad kane ka dang sah ha ka jingbishar ha kaba iadei bad ki trai khyndew ha kane ka bynta kaba 2.5 Km.
Ki thymmei khubor kila iathuh ba ha u bnai Kyllalyngkot 2026 ka NHIDCL kala dep ban siew ia ka pisa sha ka Meghalaya Power Transmission Corporation Limited ba kan pynkynriah ia u wei u Transmission Line ba dei iaid ka surok bad ki High Power Tension Line ba ia kine ruh ki hap ban pynkynriah namar ki don ha lynti ban shna surok.
Haba iadei bad kane mynta la jan phra bnai eiei ka MePTCL kam pat shym pynkynriah ia u wei u Transmission Line bad ia ki High Power Tension Line namar kane ka hap ha ka jingpeit katei ka kompeni ka MeECL bad kane ka jingpynslem kam dei na ka NHIDCL hynrei ka dei na ka MePTCL.
