Shillong, Nailur 06: Kum shibynta ban pynurlong ia ka jingangnud jong ki paidbah ka thain Nongthyllep, Eastern West Khasi Hills District, hynne ka sngi la ioh ban plie ia ka Nongthyllep Sub-Centre da u Lamphang ka Iing Dorbar Thaw Ain ka jylla Meghalaya uba long ruh u MLA ka thain.
U Bah Metbah Lyngdoh ha ka prokram plie ba la pynlong da ka ophis jong ka District Medical and Health Officer, West Khasi Hills District, Nongstoin ha ryngkat ka jingiatreilang jong ka Directorate of Health Services (MI), Meghalaya bad ka Health Engineering Wing, Meghalaya, Shillong.
Ha kane ka sngi la sakhi ia ka jingdon ryngkat lang jong u MDC ka thain, u Bah Batskhem Ryntathiang, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka distrik, u Bah M.B Syiem, ki ophisar jong ki tnat treikam bapher bapher jong ka sorkar, ki nongialam shnong, ki khynnah pule bad ki paidbah nonshongshnong ka shnong Nongthyllep.
Haba ai jingkren ha kane ka prokram, u kongsan, u Lamphang ka Iing Dorbar Thaw Ain ka jylla, u Bah Metbah Lyngdoh u la ai khublei bad u la pynpaw ruh ia ka jingsngewnguh ia ki nongtrei ka tnat ka koit ka khiah, ki nongialam shnong bad kumjuh kito baroh kiba la ia don bynta ha ka ban pynurlong ia kane ka Sub-Centre.
Ha kane ka jingialang u la ong ruh ba ka jingplie ia kane ka Sub-Centre ka long shibynta jong ka jingpyrshang ka sorkar ban pynjan shuhshuh ia ki jaka sumar nongpang sha ki paidbah khamtam eh kito kiba hap hapoh ka jylli treikam jong ka Nongthyllep Sub-Centre.
Haba kren halor ka jingdonkam jong ka koit ka khiah ha ka jingim jong ki briew kaba man ka sngi, u kongsan u la kyntu ia baroh kiba la sakhi lang ia kane ka prokram bad khamtam eh ia ki longkmie kiba armet ba kin shim kabu ia ka jingdon jong ka Sub-Centre ha shnong Nongthyllep da kaba leit sumar bad phah eksamin tista bad ban ialam ruh iala ki khunrit ban iashimbynta ha ki prokram ai tika kiba pher ba pher ba ka tnat ka koit ka khiah ka ju pynlong na ka por sha ka por.
Kiwei kiwei pat kiba la kren ha kane ka jingialang plie ia kane ka Sub-Centre ki kynthup ia u MDC ka thain, u Bah Batskhem Ryntathiang, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u Bah W. Nongsiej, ka District Medical &Health Officer ka West Khasi Hills District, Nongstoin, ka Dr. S.A Lyngdoh, u Junior Specialist na ka ophis ka District Medical &Health Officer, West Khasi Hills District, Nongstoin, u Dr. W.Sutnga bad u Sordar ka shnong Nongthyllep, u Bah M. Ryntathiang.
Lah ban kdew hangne ba ki katto katne ki jingshakri ba ka Nongthyllep Sub-Centre ka don ban ai sha ki paidbah ki kynthup ia ka jingsumar ia ki longkmie ba armet bad ki khyllung, ban ai tika ia ki khyllung, ka jaka kha khyllung bad ban eksamin ia ka jingdon jong kino kino ki jingpang kiba iabit bad bym iabit ha ki nongpang kiba wan phah sumar ha ka.
