Shillong, Naitung 15: Ka North Eastern Council (NEC), kaba hap hapoh ka Ministry of Development of North Eastern Region (MDoNER), kala pyllait haduh T. 13.58 klur hapoh ka skhim jong ka NEC (SoNEC) naduh u Jymmang haduh Jylliew 2026 na ka bynta ka jingkyrshan ba pura iaka koit ka khiah jong ka jylla Meghalaya, pule puthi, ki tiar ba lah ban pyn thymmai biang, was bniah, kolshor bad kiwei kiwei ki kam pynroi.
Ka jingshem bakhraw hangne ka long iaka jingbuh iaka jingpyn treikam iaka 1.5 Tesla MRI System ha Tura Civil Hospital, kaban lah ban pynbiang na ka bynta ki nongpang ha Garo Hills bad kiwei kiwei ki jaka ba jan. Katba ha ka bynta jong ka pule puthi, ka NEC kala kyrshan iaka roi ka par ha Shillong Polytechnic bad ka jingpyn iar iaka jinghikai ba bun rukom ha ka nongbah Shillong kaba la pyniaid da ka NERCORMS ban pynskhem iaka jingai jinghikai teknikal bad ka jingtbit ha ka jaka pule.
Na ka bynta ban pynneh iaka kolshor bad riewspah jong ka Meghalaya, ka NEC kala ai jingiarap iaka Seng Khasi Cultural Complex bad ka Seinraij Jowai Community Hall, da kaba pynioh jaka iaka kolshor, pule dangle bad kiwei kiwei ki kam na ka bynta ka imlang ka sahlang.
Ka NEC kala kyrshan ruh iaka jingtei ba thymmai ha Iewduh, da kaba pynbiang iaki nongkhaii, nongrep bad ki nongthied nongpet. Ha ka bynta jong ka jingpyn thymmai iaki tiar ki tar, ka NEC kala kyrshan iaka jingpeit bad ki jingtohkit ha Mawblei, Myntdu Leshka Stage-II bad ka projek jong ka Selim Hydroelectric, ka jingpynkhreh kaba thymmai na ka bynta ka roi ka kiew jong ka bording kaba khuid ha ka jylla.
Ha u Jymmang bad Jylliew 2026, ka NEC kala dep pyllait iaka jingbei tyngka kaba kot haduh T. 18.93 klur iaki tnad treikam jong ka thain kynthup iaki jaka pule, jaka pule teknikal, ki NGO, imlang sahlang bad kiwei kiwei, na ka bynta ka jingkiew jong ka thain shatei lam mihngi. Katba iaka bynta jong ka pisa ba la dep pyllait, ka dei na ka bynta ban kyrshan iaki katto katne ki tamasa bad ki projek pule kiba la pynlong ha Meghalaya kum ka Industry Academia Research Conclave-2025 kaba la pyniaid da ka NIT-Meghalaya, jingiakop thei bad rang bhabriew 2026 ha NEIGRIHMS, Shillong.
Ka jingpyndep iaka prokram ba la pyniaid ka NEC, ka jingpynbha iaka Shillong Umroi Airport Road ha u Jylliew, 2026 ka dei ka lad kaba kongsan ban pynsuk iaka leit ka wan sha ka iew ka hat bad ban kyntiew iaka jingleit jngohkai, ka khih ka khrong, bad ka pynbha iaka leit ka wan ha ka thain.
Kane ka jingpynlut pisa ka pynshisha biang iaka jingkut jingmut ka sorkar (NEC) ban pynsted iaka roi ka par kaba kdup lang bad kaba neh slem ha Meghalaya, da kaba pynkhlain iaka koit ka khiah, ka pule puthi, ka thoh ka tar, ka bording pynkylla, ka riewspah riti dustur, ka pyniasoh bad ka nongrim shnong thaw, lyngba kine ka pynbha iaki jingshakri paidbah bad pynkiew iaka jingim kaba kmen bad khlem da pynduh iaka mariang.
