Shillong, Jylliew 03: U Myntri Rangbah Conrad K Sangma mynta ka sngi ula pyniaid ia ka jingialang bishar kam ba hakhlieh duh bad ka Tnad Pule Puthi ban bishar bniah ia ka jinglah treikam ka Meghalaya ha ka Performance Grading Index )PGI) bad shong bishar ruh ia ki jingpynkylla kiba bun bala shim ban pynkhlain ia ka rukom treikam ka Tnad pule dangle ha Jylla.
Ha ka jingai jingbatai kaba bniah, ki Ophisar kila kdew ia ki nongrim bapher bapher kiba synniang sha ka rukom ai kyrdan ha ka PGI bad pynpaw ba ki sienjam kiba kongsan kila treikam mynta ban pynjanai ia ka jingmih na ki jingpule, pynkhlain ia ki jingtei ha ki skul, pyniar ia ka Vocational Education, bad pynkhlain ia ka Data Management System.
U Myntri Rangbah ula iai ban ba ka Meghalaya ka dang iai neh skhem ha ka jingkut jingmut ban pynjanai ia ka jingmih na ki jingpule bad pynthikna ba man ki khynnah ha ka Jylla kin ioh ia ka pule puthi kaba bha.
Ka jingbatai ka pyni ia ka rukom long kaba pher ha ka kam pule dangle ha Meghalaya, ha kaba haduh 14,600 tylli ki skul kila ai ka jingshakri ia kumba 30 lak ngut ki nongshongshnong. Kane ka jingbun ki skul ka pyni ia ka jingtrei shitom bala slem jong ka Jylla ban pynthikna ba wat ki shnong kiba sha kyndong eh kin ioh ia ka jingleit skul, ban pynlong ia ka Meghalaya kawei na ki Jylla kaba don ia ki skul ha man ki dong ki thain hapoh ka thain Shatei Lam Mihngi.
Ki Ophisar kila pyntip ba ka Sorkar kala leh ia shibun ki jingpynkylla ha ka rukom treikam ha kine ki khyndiat snem bala leit, kynthup ka jingkynshew ha ka jinghikai naduh tynrai, ka bha ka miat ki nonghikai, ki jingtei ha ki skul, ka jingpynbiang ia ki jinghikai lyngba ki kor digital bad ka rukom treikam kaba kyrshan ia ki khynnah pule.
Ka jingialang kala pynpaw ba “Ka jingmih na ki jingpule” kaba kit bha hapoh ka jingai kyrdan PGI, ka iai long ka jingpynleit jingmut ba hakhmat eh jong ka Sorkar. Bun ki sienjam kiba thmu ban pynkhlaiñ ïa ka thoh ka tar bad ka khein jingkhein, pynjanai ia ki rukom ai jinghikai ha ki kamra klas, bad kyrshan ia ki khynnah pule, ki dei kiba la pyntreikam ha baroh kawei ka Jylla.
Ka jingialang kala shong bishar ruh ia ka bynta ba dang iaid jong ka jingkyntiew kyrdan ia ki jingtei ki skul. Ki jingpyrshang kiba bun la leh ban pynkha bad pynkhlain ia ki science laboratories, ICT, Smart Classroom, Library, Kitchen garden, Rain Water Harvesting, ka jingpynbiang um bad ki jingpyndait ia ki kor solar ha ki skul ha kylleng ka Jylla.
Haba ithuh ia ka jingdonkam ka jingbahkhlieh ha man ki district, u Myntri Rangbah ula bthah ia ki Deputy Commissioner bad ki bor district ba kin iatrei ryngkat ryngkat bad ka Tnad Pule Puthi ha ka lynti kum ka mishon ban lah pynsted ia ki jingpyntreikam, ithuh ia ki jingduna bad ban pynthikna ha kaban leh kloi ia ki kam kiba kongsan.
Ka jingpynleit jingmut ba hakhmat eh jong ka jingialang bishar kam ka long ka pule dangle Vocation bad Skill. Ki Ophisar kila pynpaw ia ka Community Skill Integrated Curriculum, ha kaba ki khynnah pule naduh ka kyrdan Primary haduh Secondary kila ioh ia ka jinghikai halor ka sap ba ki don. Kane ka sienjam la khmih lynti ba kan synniang shikatdei eh ia ka jingmih na ka jingpule hadien habud bad ka jingleh bha ha ka jingai kyrdan.
Ka Sorkar kala pynkhlain ruh ia bun ki prokram kiba iadei bad ka bha ka miat ki khynnah pule, kynthup ka jingpynjanai ia ka prokram Mid-Day Meal, ka jingpyndait iaka Sanitary Pad Vending machine bad Incinerator ha ki skul ki Kynthei bad kiwei ki sienjam ban wanrah ia ka sawdong sawkun kaba shngain bad ba kyrshan ia ki khynnah.
U Myntri Rangbah ula bthah ia ka Tnad ba kan iai bteng ban peitthuh bha ia baroh ki dak jingtreikam bad shim ia ki sienjam kat haba donkam. Ula kular ia ka jingkyrshan ba pura na ka Sorkar ban pynthikna ba ki skul ki ioh ia ka pisa bad jingiarap kaba ki donkam ban kynjoh ia ka jingkylla kaba lah ban khein.
Ka jingialang kala shong bishar ruh ia ki jingpyrshang ba dang iaid shakhmat ban pynkhlain ia ka synshar digital bad ki rukom treikam jong ka jingkheiñ jingdiah ha ka pule puthi.
Ka Sorkar kala shim ia ki sienjam ban pynjanai ia ka rukom ai jingtip, ka jingbud ryntih haba pyndonkam ia ka kor digital, ka jingpyniasoh Aadhaar, bad ka jingpynbeit ia ki kot ki sla jong ki skul ban pynthkna ba ia ka jingkiew jong ka pule puthi ha kylleng ka Jylla la pynpaw hok ha ki jingbishar jong ka ri.
Kawei ka bynta kaba kongsan jong ka jingbatai ka long ka jingkiew kaba la leh hapoh ka prokram rationalization jong ki skul. Napdeng ki 14,582 tylli ki skul ha Meghalaya, 3,198 tylli ki skul la dep ban pynïasoh, kaba ailad ïa ka jingpyndonkam bha ïa ki nonghikai, ka jingpynjanai ia ka jingsam song pisa, bad ka jingai bha ïa ki jingshakri ha ka pule puthi.
Ki Ophisar kila batai ruh ia katto katne ki jingpynkylla ha ka rukom treikam kaba ka jingktah jong ki la antad ba kan nang paw shuh shuh ha ki jingbishar kiba ha ki por ban wan.
Haba kren ha ka jingialang,u Myntri Rangbah ula ong “Ngi iatip bha hangno ka Meghalaya ka ieng, bad ngi iatip ruh ia ka jingkiew kaba ngi dang leh.
Ka pule puthi ka dei ka jingkynshew kaba bun snem, bad ki jingpynkylla kaba ngi la shim ha kine ki khyndiat snem- na ka jingpynkhlain ia ki jingkyrshan ia ki nonghikai jong ngi sha ka jingpynleit jingmut ia ka jingai jinghikai naduh tynrai bad pynbha ia ki jingtei jong ki skul- ki buh ia u mawnongrim na ka bynta ka jingkylla kaba neh slem.
ka sorkar kala pynthikna ba man ki khynnah ki dei ban ioh leit skul, ka thong jong ngi mynta ka long ban pynthikna ba man ki skul ki ai ia ka jinghikai kaba bha tam. Ngi kut jingmut pura ban pynkylla ia ka jingmih na ka jingpule na ka bynta ki Khynnah pule ka Meghalaya”.
U Myntri Rangbah u la bthah ruh ïa ka tnad ban pyndonkam ïa ka rukom treikam kaba bniah, kaba don nongrim ha ka jingshem, bad kaba shaniah ha ka jingkheiñ jingdiah ban dang ïai kyntiew ïa ka jingtreikam ha ka pule puthi.
U la banjur ia ka jingdonkam ki jingbishar ba man ka por, ki sienjam kiba pynshong nongrim na ki jingshem, bad ka jingïatreilang kaba khlaiñ hapdeng ki skul, ki district, bad ka Sorkar Jylla.
