Shillong, Nailar, 29: Ka jylla Meghalaya kala pynkhreh iaka National Games ba 39 jong ka Ri kaban long ha u bnai Lber 2027. Kane kan long ka jingialehkai kaba heh ha ka Ri bad ka jylla kan ioh ban pyni iaki sap ki phong kaba ki samla ki don. Ha kajuh ka por, donkam ruh ban shna bad ban pynbha khnang ba kan long kaba I shongkun.
Ka sorkar jylla kala shim khia ban pynkhreh iaka National Games ha kaba bun na ki jaka ba pynlong iaki jingialehkai, la pynbha ka jingpynkhreh iaki nongialehkai da ki kynhun ialehkai bapher bapher bad ha kajuh ka por ban peit ba kiwei kiwei ki jingpynkhreh ruh kin ia ryngkat.
Ka sorkar kala thaw iaka National Games Secretariat Society kane ka long ban don ka jingiatreilang ha kaba pynkhreh ia kane ka jingialehkai, ka jingpynkhreh iaka jaka sah ki jaka ialehkai, ki kali ban kit iaki nongialehkai bad kumjuh iaki nongsumar bad ki kynhun ban ai pahara bad kiwei kiwei ki jingdonkam.
Ha kane ka National Games kaba 39th, kin don ruh 39 ki jait jingialehkai bad ki jaka ialehkai ki long kum ka Shillong, kum ka nongpdiang iaki jingialehkai, nangta kin long ruh ha Tura bad Jowai. La khmih lynti ba ki nongiashim bynta ha ki jingialehkai bapher bapher kin don 12000 ngut.
Ban pynthikna ba ki jingialehkai kan long kaba iaid beit iaid ryntih, la shna iaka Centralized Game – Time Command bad Coordination Mechanism. Kane ka long ba ka jingpynkhreh kan iaid beit iaid ryntih dei halor kane ba ka sorkar jylla kala pyllait pisa T. 100 klur bad ia kane ka pisa, yn buh bad ka Meghalaya Legislative Assembly na ka bynta ka jingdonkam jong ka 39th National Games 2027.
